Ja Resulall-llah, o simbol i Paqes,
o Mëshirë e dhuruar…
14 janar 2015
Thonë se qielli pa
yje, në netë të errëta idhnake, si dita
pa diell, në një mot gjëmimesh, në ditë
të hirta, si netë pa yje… U them, bota
pa Dritën tënde, si tanësia pa njerinë,
ja Resulall-llah…
Sa herë bie nata, pelerinë e
heshtjes, kur botën në qetësi mbulon,
diku larg në horizonte, zëri i trungut
të hurmës, që për ty digjej në lotët e
ndarjes, ende dëgjohet.., në mirazhe
malli, drejt Dashnisë Tënde, ja
Resulall-llah…
Më thonë t’u flas për Ty, për mallin
Tënd… Po a ka ujë Dashnie, që pastër nga
burimet e qiellit, si rreze Drite zbret,
ta lajë zemrën, t’i japë abdest të
përzgjedhurish, emrin Tënd ta shqiptojë,
veshur me petk malli, ja
Resulall-llah..?
Mundohem të hap dyert e historisë, të
kapem diku në një cep të pelerinës
tënde, të bëhem dëshmitar… Dua të bëhem
dëshmitar, bota të dëgjojë! Dua të bëhem
dëshmitar, besa të jetojë, brez pas
brezi, si zinxhir Nuri, kapur pas
vështrimeve Tuaja plot Butësi Edukatori,
ja Resulall-llah..!
Ti, zotëria im, qëndron ulur nën hijen e
flladeve, që plagët e lënduara, me
bekime mëshironjëse të shërojnë… Me
duart lart nga qielli, në lutje, ëmbël
nxjerr dritë zemre: “O Zoti im, nëse Ti
nuk je i zemëruar me mua, asgjë nuk ka
rëndësi..!”
Diku larg, të parët e Taifit dhe
pasuesit e tyre, gëzojnë në hutinë e
tyre, të lumtur nga sharja, fyerja e
goditja… Ende mbajnë gur në duar, në
zenit të paragjykimit… Ata të kanë
lënduar, zotëria i humanizmit…
Tashmë, shijojnë lirinë në dhimbjen
tënde, ndërsa Ti lartësohesh në krahët e
Pëlqimit hyjnor, që fatet e tyre t’i ka
lënë në dorë… E Ti, buzëqesh në fytyrën
e lajthitjes së tyre dhe vendos, në
madhështinë e Mëshirës Tënde, që ata të
jetojnë, lirshëm të rrugëtojnë drejt
kaderit të tyre, me gurë në duar…
Bijtë e tyre, do ta lartësojnë Zotin Një
dhe, me emrin Tënd të bukur, salavate
lavdesh, drejt hapësirave të pendimit,
gjithnjë do të dërgojnë…
Dhe nga ajo ditë, liria e të hutuarit,
vazhdon të përplaset për brigjet e
Madhështisë Tënde, duke u thyer në
dëshpërim, si dallgë të zemëruara deti
në dimërim…
Ja Resulall-llah, o simbol i Paqes, o
Mëshirë e dhuruar, që qytetin e gurëve
sfidove, me lutjen e Mallit Tënd për
shekujt plot Teuhid…
Muhamed
B. Sytari
Shkodër, 14 janar 2015
 |
