Myftinia Shkodër

Ditën e xhuma, më 26 dhjetor 2014, nga minberi i xhamisë së Parrucës, Myftiu i Shkodrës, Imam Muhamed Sytari, foli mbi vlerat e përkujtimit të Lindjes së Begatë të Hz. Muhammedit (a.s), që përkon me ditët e para të muajit janar 2015.

Ai theksoi se vlerat e tolerancës ndërfetare, me të cilat u dërgua Hz. Muhammedi (a.s), janë një garanci e madhe për mbarë botën, sidomos në ditët e sotme.

Myftiu tha se këtë vit, përkujtimi i dy prej burrave më të mëdhenj të njerëzimit; Hz. Isait (a.s) dhe Hz. Muhammedit (a.s), erdh shumë pranë njëri-tjetrit, me gjithë debatet rreth saktësisë së datës së parë. Ai tha, se kjo koinçidencë, është njëkohësisht një moment reflektimi për botën islame dhe atë të krishterë, drejt respektimit të ndërsjelltë, për të ndërtuar së bashku ura lidhës në mesin e qytetërimeve dhe paqes në botë, në harmoni dhe respekt reciprok.

Gjatë kësaj hytbeje, Myftiu dënoi njëkohësisht edhe aktin e mbajtjes së meshës të zhvilluar sot paradite nga Famullia e Shën Shtjefnit, Shkodër, në objektin që njihet si: xhamia e Sulltan Mehmet Fatihut, në kalanë Rozafa.

Myftiu tha: "Si do ju dukej sikur t'ju ftoja me falë xhumanë, aty ku është kisha, rrëzë kalasë, që dikur ishte teqe bektashite?! Normalisht që nuk do ta bëj, se nuk ka logjikë dhe nuk ma ndjen zemra e s’ma pranon logjika" Dhe theksoi se kjo meshë nuk duhej bërë në një vend të tillë, përtej pretendimeve të sakta se origjina e lashtë e këtij objekti ka qenë kishë. Mirëpo, “askush nuk ka të drejtë të cënojë simbolet fetare të muslimanëve në emër të origjinave të lashta, ne nuk do ta bënim, nuk e bëjmë. Ky është një provokim që nuk e pranojmë dhe nuk e tolerojmë”- tha Myftiu.

Njëkohësisht theksoi se vlerat e harmonisë ndërfetare, duhen ruajtur dhe nuk duhen cënuar nga asnjë sjellje e pamatur dhe e papjekur e kujtdo, që harron kufirin dhe cënon atë që nuk është e tij!

“Shembujt e tolerancës dhe humanizmit tonë gjatë shekujve, pikërisht këto mësime, që vërtetojnë madhështinë e Hz. Muhammedit (a.s) si edukator i tolerancës, na bëjnë të ndjehemi krenar për fenë tonë dhe të jemi përherë promotorë të paqes, harmonisë dhe tolerancës në mesin e besimtarëve dhe besimeve të tjera. Shkodra ndjehet krenare me diversitetin e saj fetar. Detyra e prijësve fetarë, të cilësdo fe, është të ndërtojë me maturi dhe urtësi, ura lidhëse dhe paqe në shoqërinë e tij.”- përfundoi Myftiu.

 

---