Myftinia Shkodër

Ditën e xhuma, më 12 dhjetor 2014, pas inaugurimit të xhamisë më të re në Shkodër, e quajtur: “Xhamia e Dy Vajzave”, u fal edhe namazi i parë i xhumasë. Hytbeja e rastit u mbajt nga Myftiu i Shkodrës, Imam Muhamed Sytari.
 
Në një atmosferë të mrekullueshme feste, xhamia e re, nuk ishte e mjaftueshme për besimtarët e shumtë, që kishin ardhur për të ndarë kënaqësinë e kësaj dite të paharruar.
 
Në hytben e tij të kësaj jave, Myftiu foli mbi rëndësinë e bartjes së amanetit të Thirrjes Islame, brez pas brezi, me krenari dhe pa ndrojtje. Ai theksoi se porositë e fundit, që Resulull-llahu (a.s) i la sahabëve, pak ditë para se të largohej nga kjo botë, janë njëkohësisht edhe një amanet për secilin prej nesh.
 
Gjatë kësaj hytbeje, Myftiu i Shkodrës bëri thirrje që muslimanët të respektojnë moralin dhe shpirtin e fesë së tyre, duke u bërë thirrës drejt vlerave islame për këdo e kudo. Ai tha se fushatat e shumta të islamofobisë, nuk janë asgjë tjetër vetëm se një shtysë më shumë për secilin prej nesh, për të jetuar dhe dëshmuar bukurinë dhe mirësitë e fesë islame në jetën e përditshme.
 
Myftiu falënderoi donatorët nga Kuvajti për ndërtimin e kësaj xhamie të re, duke theksuar se ndërtimi i saj është një mirësi e madhe besimi që i shtohet Shkodrës së vlerave islame, qytetit të vjetër të minareve të shumta. Njëkohësisht ftoi besimtarët që të jenë frekuentues të rregullt të namazeve ditore, duke u bërë dëshmitarë të Islamit dhe adhurimeve të tij, ditë pas dite.
 
Namazi i xhumasë së parë në Xhaminë e Dy Vajzave, u drejtua nga studiuesi i afirmuar i hadithit, Shejkh Mahmud Abdulkadir Arnauti, djali i muhadithit të famshëm me prejardhje nga trojet tona në Kosovë, që jetoi, punoi dhe ndërroi jetë në Damask të Sirisë.

 

---