Myftinia Shkodër

U zhvillua sot ceremonia e inaugurimit të xhamisë më të re në qytetin e Shkodrës, e quajtur: "Xhamia e Dy Vajzave". Në këtë ceremoni nderonin me pjesëmarrjen e tyre: Nën/Kryetari i KMSh, z. Ali Zaimi, Kryetari i Komitetit Shtetëror për Kultet, z. Ilir Hoxholli, Kryetari i Këshillit të Qarkut Shkodër, z. Maxhid Cungu, Drejtori i AIITC, z. Ramiz Zekaj, Myftiu i Tiranës, z. Ylli Gurra, Myftiu i Malësisë së Madhe, H. Edmir Smajlaj, Drejtori i Kulturës në KMSH z. Genti Kruja, Drejtori i Haxhit në KMSH z. Hamdi Çurri, Drejtori i Medresesë "Haxhi Sheh Shamia", z. Kujtim Dervishi, drejtues të shoqatave të ndryshme bamirëse, intelektualë e besimtarë të shumtë.

Ceremonia u përshëndet nga Myftiu i Shkodrës, Imam Muhamed Sytari, që vlerësoi këtë ditë si një ditë bajrami dhe gëzimi të madh për lagjen Shabanej dhe mbarë qytetin e Shkodrës. Ai falënderoi prezencën e z. Ahmed Al-Shaye nga Kuvajti, donator dhe përfaqësues i familjeve që ndihmuan në sponsorizimin e kësaj xhamie, me ndërmjetësinë e Institutit Shqiptar të Mendimit dhe Qytetërimit Islam.

Nën/Kryetari i Komunitetit Mysliman të Shqipërisë, z. Ali Zaimi, uroi që kjo xhami të jetë një vatër besimi dhe dije për lagjen dhe për mbarë qytetin e Shkodrës. Ai uroi besimtarët edhe në emër të Kryetarit, z. Skënder Bruçaj, duke shprehur njëkohësisht edhe vlerësimin që Komuniteti Mysliman i Shqipërisë i ka dhënë ripërtëritjes së infrastrukturës fetare në vend, pas viteve '90.

Përshëndeti edhe Kryetari i Këshillit të Qarkut Shkodër, z. Maxhid Cungu, që vlerësoi se ngritja e institucioneve të reja të kultit në Shkodër është një mirësi e madhe dhe një tregues i besimit dhe gjallërimit të jetës fetare në qytetin tonë.

Nga ana e tij, Kryetari i Komitetit Shtetëror për Kultet, z. Ilir Hoxholli, përmendi se Shkodra po kthehet në një qytet, ku minaret e xhamive po e zbukurojnë si duhet hartën e xhamive, që dikur e bënin këtë qytet të tregohet me gisht për vlerat e besimit dhe qytetarisë islame.

Aktiviteti u zbukurua edhe këndimin e dy ilahive nga nxënës të Medresesë "Haxhi Sheh Shamia", dega djem.

Drejtori i AIITC, Dr. Ramiz Zekaj, vlerësoi këtë xhami si një dhuratë të bukur për popullin musliman të Shkodrës, në kuadrin e bashkëpunimeve në mesin e institucioneve islame. Ai theksoi se nga dita kur Hafiz Sabri Koçi mbajti hytben e parë dhe drejtoi namazin e xhumasë së parë në Shkodër, më 16 nëntor 1990 e deri më sot, shumë xhami po e plotësojnë përherë e më shumë nevojën e besimtarëve për këto institucione të adhurimit.

Ceremonia u përshëndet edhe nga z. Ahmed Al-Shaye, përfaqësues i familjeve donatore nga Kuvajti. Ai tha se sot, ndjehet shumë i gëzuar për këtë inaugurim të xhamisë që mban edhe emrin e vajzës së tij, Shehd, që së bashku me shoqen e saj Sara, humbën jetën para rreth dy vitesh, në një aksident të dhimbshëm. Ai tha se kjo xhami është edhe një shenjë e vëllazërimit që muslimanët kanë në mes vete.

Pas prerjes së shiritit të inaugurimit, të pranishmit morën pjesë në faljen e xhumasë së parë në këtë xhami të re, duke uruar njëri-tjetrin për këtë mirësi të madhe.

 

---