Myftinia Shkodër

Ditën e mërkure, më 10 dhjetor 2014, Myftiu i Shkodrës, Imam Muhamed Sytari, zhvilloi inspektimin e fundit në objektin e Kompleksit të ri Islam të Shkodrës, në lagjen Shabanej, në prag të përurimit.
 
"Xhamia e Dy Vajzave", te vakëfi i Shaban Efendisë, afër sheshit të Tophanës, është xhamia më e re në qytetin e Shkodrës, që po bëhet gati të hapë dyert e saj për besimtarët dhe sidomos për të rinjtë muslimanë, që pritet të jenë frekuentuesit e saj kryesorë, duke marrë parasysh edhe ambientet e reja shumëfunksionale të saj.
 
I pranishëm ishte edhe përfaqësuesi i donatorëve, z. Ahmed Al-Shaye, i cili ka ardhur nga Kuvajti enkas për ceremoninë e inaugurimit, që me mbarësinë e Zotit, do të zhvillohet të xhumanë, më 12 dhjetor 2014.
 
Myftiu e ka falënderuar përzemërsisht z. Al-Shaye për interesimin e madh dhe vizitat e ndryshme në Shkodër, që ka bërë gjatë punimeve të xhamisë, duke vërtetuar sinqeritetin dhe përgjegjësinë e amanetit të madh për ndërtimin me sukses të kësaj xhamie të bukur e të pastër. Njëkohësisht ka shprehur edhe vlerësimet e tij për AIITC dhe interesimin e vazhdueshëm të drejtuesit të tij, z. Ramiz Zekaj, për finalizimin e këtij projekti të dobishëm për Myftininë e Shkodrës.
 
Pasi kanë vizituar ambientet e reja të kompleksit të ri, Myftiu dhe z. Al-Shaye kanë shprehur kënaqësinë e tyre për këtë arritje, që është një dhuratë e sinqertë besimi dhe vëllazërie njerëzore nga një grup besimtarësh kuvajtianë për qytetin e Shkodrës.
 
Me këtë rast, Myftinia Shkodër ju fton të merrni pjesë në faljen e xhumasë së parë, që përkon me ceremoninë e përurimit të Kompleksit të ri Islam: “Xhamia e Dy Vajzave, Sara dhe Shehd”, te vakëfi i Shaban efendisë, ditën e xhuma, më 12 dhjetor 2014, ora: 11.00.

 

---