Myftinia Shkodër

Myftiu i Shkodrës, Imam Muhamed Sytari, priti pasdrekën e së xhumasë, më 21 nëntor 2014, në një takim të përzemërt, Kryetarin e dytë të Vakëfit të Dijanetit të Republikës së Turqisë, z. Maz’har Bilgin, që shoqërohej nga z. Shaban Ishlek, Këshilltar i Fesë në Ambasadën e Republikës së Turqisë në Tiranë.

Pas përshëndetjeve të mikpritjes, Myftiu i Shkodrës shprehu vlerësimet e tij për kontributin e vazhdueshëm që Dijaneti i Turqisë ka dhënë ndër vite për zhvillimin e mëtejshëm të Thirrjes Islame në vendin tonë. Ai vlerësoi se akoma sot është i mirëpritur kontributi i imamëve nga Turqia, që mund të shërbejnë në xhami të ndryshme të Shkodrës.

Nga ana e tij, z. Bilgin theksoi se interesi i Dijanetit është të japë ndihmën e vet në Shqipëri, në shumë fusha e drejtime, pa interes, thjeshtë si urë lidhëse e asaj historie shekullore që bashkon dy popujt tanë.

Ai theksoi gjithashtu se Dijaneti i Turqisë ndjek me shumë vëmendje zhvillimet për përfundimin e procedurave që do lejojnë fillimin e punimeve për Xhaminë e Namazgjasë në kryeqytetin e Shqipërisë, sponsorizues i të cilës do jetë Vakëfi i Dijanetit të Turqisë.

Për nder të mikut turk, Myftiu shtroi një drekë vëllazërore.

 

---