Myftinia Shkodër

Myftiu i Shkodrës, Imam Muhamed Sytari, mblodhi sonte, të mërkurën, më 19 nëntor 2014 një këshill të përbërë nga anëtarë të Këshillit të Myftinisë, imamë dhe intelektualë, për të diskutuar rreth përgatitjeve që i paraprijnë festimit të 25 vjetorit të rilejimit me ligj të lirisë së besimit, që përkon me 16 nëntor 2015, datë në të cilën përkujtohet ceremonia e rihapjes së Xhamisë Plumbit, më 16 nëntor 1990.

Në këtë takim, Myftiu paraqiti fillimisht disa mendime për organizimet e ndryshme të përkujtimit të kësaj date të shënuar për mbarë popullin shqiptar. Ai theksoi se takimi i kësaj mbrëmje, duhet të shërbejë si një fillim serioz drejt përgatitjeve korrekte për festimin e një date, që shënon një çerek shekulli liri besimi në Shkodër.

Më pas, dëgjoi me vëmendje mendimet e shumta dhe idetë e dhëna nga të pranishmit në këtë takim: H. Fejzi Zaganjori, shkrimtari Xhahid Bushati, z. Mithat Myftija, z. Kujtim Dervishi, z. Artur Tagani, z. Lavdrim Hamja, z. Naim Drijaj, z. Admir Temja dhe z. Arben Halluni.

Ata theksuan se kjo datë është e një rëndësie të veçantë, jo vetëm për Myftininë e Shkodrës, por në rang kombëtar, pasi shënon përfundimin e një periudhe të errët femohimi dhe ateizmi zyrtar dhe nisjen e një epoke të re në respektimin e të drejtave të njeriut në Shqipëri, ku liria e besimit ka një vend të shenjtë.

U theksua gjithashtu se ky këshill do të zgjerohet në funksion të realizimit të ideve dhe projekteve që dalin prej tij, në rrugën e përkujtimit të merituar të kësaj date dhe këtij viti jubilar.

Me këtë rast, Myftinia Shkodër fton të gjithë besimtarët dhe dashamirët e saj, që të kontribuojnë materialisht në ndihmë të projekteve të shumta, që presin të marrin jetë në funksion të konkluzioneve të këtij takimi të parë në prag të fillimit të vitit 2015, që do të jetë një vit i veçantë aktivitetesh për Myftininë Shkodër.

 

---