Myftinia Shkodër

Pasditën e së xhumasë, më 14 nëntor 2014, Myftinia Shkodër zhvilloi një aktivitet përkujtimor në kinema 'Millenium', me rastin e 24 vjetorit të rihapjes së xhamisë së Plumbit, ku u shfaq i plotë edhe filmimi i ceremonisë së asaj dite.

I pranishëm në këtë aktivitet ishte edhe Kryetari i Komunitetit Mysliman të Shqipërisë, z. Skënder Bruçaj, nën/kryetari i KMSh, z. Ali Zaimi, Rektori i Universitetit 'Bedër', dr. Ferdinand Gjana, Arqipeshkvi Shkodër/Pult, mons. Angjelo Massafra, Famullitari i Kishës Ortodokse, At Nikolla Petani, Kyetari i Bashkisë Shkodër, z. Lorenc Luka, Prefekti i Qarkut Shkodër, z. Paulin Radovani, Kryetari i Këshillit të Qarkut Shkodër, z. Maxhid Cungu, Kryetari i Këshillit të Bashkisë Shkodër, z. Bardhyl Lohja, Drejtori i AIITC, Dr. Ramiz Zekaj, Drejtori i Fondacionit 'Mirësia', z. Korab Kaja, Drejtori i Shoqatës 'Burirmi", z. Sokol Mandi, Kryetari i Shoqatës 'Istanbul', z. Ridvan Seferaj, Drejtori i Shtëpisë Botuese 'Prizmi', z. Nuh Tokçelik, Drejtori i Medresesë 'Haxhi Sheh Shamia', Shkodër, z. Kujtim Dervishi, thirrësi islam me banim në ShBA, z. Burhan Fili, imamë të xhamive, intelektualë, pedagogë, studentë e të rinj të shumtë.

Në fjalën e tij të hapjes, Myftiu i Shkodrës, Imam Muhamed Sytari, theksoi se rihapja e xhamisë së Plumbit para 24 vitesh, shënoi një kthesë të madhe në rikthimin e shoqërisë shqiptare nga ateizmi i imponuar drejt dyerve të fesë dhe Zotit. Ai vlerësoi rolin e madh të Hafiz Sabri Koçit në thirrjen dejt vlerave të Islamit dhe ato të harmonisë dhe vëllazërisë kombëtare.

Ndërkohë, Kryetari i Komunitetit Mysliman të Shqipërisë, z. Skënder Bruçaj, vlerësoi datën 16 nëntor 1990, si një moment reflektimi për të kuptuar nevojën e madhe që ka njeriu për besimin dhe vlerat e tij në jetë. Ai kërkoi nga të pranishmit që kjo datë të kujtohet përherë si një prag, prej ku nisi ripërtëritja e vlerave besimore në vendin tonë, drejt lartësimit të harmonisë kombëtare dhe vlerave më të larta të saj.

Më pas, të pranishmit ndoqën me shumë emocion materialin e filmimit të ceremonisë së para 24 viteve, duke përjetuar nostalgjinë e një date, që u kthye në një stacion drejt dritës së besimit.

Në një intervistë për Vizion Plus Tv, Myftiu i Shkodrës vuri theksin te vlerat e datës 16 nëntor 1990, si simbolikë e shtrenjtë e vëllazërisë kombëtare dhe bashkëpunimit të muslimanëve dhe të krishterëve shqiptarë drejt kthimit të përbashkët nga Zoti dhe vlerat e besimit.

 

---