Myftiu: “Hz. Husejni,
shembull i gjallë për rininë islame!”

Nga minberi i xhamisë "Ebu Bekër", ditën e xhuma, më 31 tetor 2014, Myftiu i Shkodrës, Imam Muhamed Sytari, ka folur mbi stacionet historike të ditës së Ashurasë, si një datë e shënuar në kalendarin hënor.
 
Myftiu ka theksuar se kjo ditë, mbart në vetvete shumë mesazhe, që lidhen me besimin dhe respektin e tij, lidhjen shpirtërore të profetëve me njëri-tjetrin dhe forcën e adhurimit në jetën e besimtarit.
 
Duke u ndalur tek ndodhitë e Ashurasë, Myftiu ka folur edhe mbi personalitetin e Hz. Husejnit (r.a), nipit të dashur të Hz. Muhammedit (a.s). Ai ka theksuar se në jetën e Hz. Muhammedit (a.s) janë shumë momente të bukura që dëshmojnë dashurinë e tij për dy nipat, Hasanin dhe Husejnin.
 
Njëkohësisht ka përmendur se në ditën e Ashurasë, në vitin 61 hixhri, ka ndodhur një ndër krimet më të shëmtuara të historisë së 15 shekujve të fundit, martirizimi i Hz. Husejnit (r.a) dhe familjarëve të tij, në fushën e Qerbelasë, bri lumit Eufrat.
 
Duke rrëfyer momentet më të dhimbshme të kësaj ndodhie të rëndë, Myftiu theksoi se Hz. Husejni (r.a) është përherë një shembull inspirimi për rininë muslimane dhe këdo që dëshiron të kuptojë se Islami ka ardhur për të forcuar bazat e lirisë, dinjitetit njerëzor, drejtësisë dhe sakrificës për mbrojtjen e shenjtërive në jetë.
 
“Duhet kuptuar se lëvizja e Nipit të dashur të Pejgamberit tonë, nga Medineja drejt Kufes, nuk ishte për qëllime përfitimesh materiale të kësaj bote, por një përpjekje e pathyeshme për t’i thënë: “JO” zullumeve të shumta të kohës, në rrugën e ndreqjes së tyre. Martirizimi i Hz. Husejnit, është në vetvete një mesazh për secilin prej nesh, për të luftuar me sa të kemi mundësi me të keqen në jetë, me haramet dhe padrejtësitë, që e kanë degraduar shoqërinë tonë dhe rrugëtimet e saj. Prandaj, të gjithë, në një formë a një tjetër, kemi nevojë për shpirtin e Husejnit (r.a) në jetën tonë, në thirrjen tonë, në aktivitetin tonë” – ka thënë Myftiu gjatë hytbes së tij.
 
Gjatë kësaj hytbeje, Myftiu ka ftuar të pranishmit dhe krejt besimtarët që ta agjërojnë ditën e hënë, më 3 nëntor 2014, ditën e Ashurasë, si një traditë e dobishme e Hz. Muhammedit (a.s).
 
Hytbeja e sotme ishte e dyta radhazi që Myftiu mban në xhaminë “Ebu Bekër”, si pjesë e një cikli hytbesh tre-javor.

 


Myftiu: “Hz. Husejni, shembull i gjallë për rininë islame!”
Myftiu: “Hz. Husejni, shembull i gjallë për rininë islame!”
Myftiu: “Hz. Husejni, shembull i gjallë për rininë islame!”