Myftinia Shkodër

Ditën e xhuma, më 17 tetor 2014, Myftiu i Shkodrës, Imam Muhamed Sytari, mbajti hytben e xhumasë së parë pas kthimit të tij nga haxhi i sivjetshëm në vendet e shenjta në Arabinë Saudite.
 
Nga minberi i xhamisë së Parrucës, Myftiu foli mbi madhështinë e lidhjes së muslimanëve me Islamin e tyre dhe rëndësinë që ka sot mos ndikimi nga propaganda islamofobe në mbarë botën.
 
Myftiu solli emocione të shumta nga haxhi i sivjetshëm, ku dëshmoi se Islami është feja e këtij shekull dhe thirrja më e pasur drejt Paqes, Dijes dhe Mirëqenies në jetë. Ndër të tjera ai theksoi: “Në haxhin e sivjetshëm, pata mundësi të shoh realisht një dimension tjetër të madhështisë së fesë tonë, përhapjen e saj të shpejtë dhe përqafimin me bindje në mbarë botën. Delegacionet e shumta me haxhilerë, si nga Suedia, Norvegjia, Italia, Zvicra, Hollanda, Franca, Amerika, Kanadaja, Austria, Australia, Indonezia, India, Pakistani, Rusia, Rumania, Dagestani, Çeçenia, Maqedonia, Kosova, Shqipëria, Turqia, Kazakistani, Kongo, Mali, Somalia, Etiopia, Libia, Egjipti, Tunizia, Taxhikistani, Kamboxhia, Uganda, Kenia, etj, nga perëndimi në lindje, në një kohë të vetme, me një thirrje të vetme, në harmoni të plotë me njëri-tjetrin, ishin dhe janë dëshmia më reale e faktit se përtej fushatave pafund të islamofobisë, trillimeve, shpifjes, urrejtjes dhe përçudnimit të imazhit të kësaj feje të madhnueshme në mbarë botën, miliona besimtarë njëherazi thërrasin dhe dëshmojnë me të madhe: “All-llahu ekber”; thirrjen e paqes, harmonisë dhe ndërtimit të urave në mbarë botën!”
 
Myftiu theksoi gjithashtu se në ditën e Arefatit, në vendet e shenjta u lut edhe në gjuhën shqipe, ku theksoi: “Në Arefat, në ditën më të shenjtë të vitit, në momentet më të bekuara të vitit, u lut edhe në shqip! U lut: “O Zot ruaje Islamin e shqiptarëve, mbroje atë nga propaganda e tjetërsimit! O Zot bekoje tokën shqiptare dhe forcoje Islamin, fenë e paqes, si garanci për tokën tonë!” U lut në shqip, shumë u lut atë ditë!”
 
Më pas, Myftiu dëshmoi disa nga emocionet më të bukura, me shembuj konkretë nga përkushtimi dhe sakrifica e haxhilerëve shqiptarë në pelegrinazhin fetar vjetor më të madh në botë.

 

---