Myftinia Shkodër

Mbrëmjen e së enjtes, më 11 shtator 2014, Myftiu i Shkodrës, Imam Muhamed Sytari, ishte i ftuar në emisionin "Hapur", në Tv1 Channel, në serinë e parë të sezonit të ri të këtij emisioni.
 
Myftiu iu përgjigj pyetjeve të ndryshme gazetarit Simon Shkreli, rreth realiteteve të dhimbshme të dhunës, vrasjes, shkatërrimit të pronës dhe cënimit të lirisë në vende të ndryshme të Lindjes së Mesme dhe lidhjet e tyre me Islamin, që i vlerësoi si larg vlerave njerëzore dhe fetare dhe shenjë dekadence e njeriut bashkëkohor.
 
Myftiu theksoi se realitetet e mungesës së sigurisë dhe vrasjet, edhe në emër të fesë, që po dëgjohen kohët e fundit në shumë prej vendeve të përfshira në trazira, janë larg besimit dhe fesë islame, që mbi të gjitha urdhëron për distancim nga dhuna dhe vrasja e njerëzve të pafajshëm.
 
Gjatë emisionit, Myftiu iu përgjigj edhe pyetjes mbi marrëdhëniet ndërfetare në Shqipëri dhe origjinën e tyre në traditat burimore islame. Ai theksoi se natyrshëm, aty ku ka muslimanë, aty është edhe vullneti për të respektuar tjetrin dhe besimin e tij dhe mbi të gjitha, gatishmëria për të ndërtuar ura të dialogut dhe mirëkuptimit ndërfetar, bazuar mbi respektin e ndërsjellët dhe vullnetin e mirë të kultivimit të kësaj fryme qytetëruese.
 
Myftiu iu referua Kur’anit dhe Traditave profetike të Hz. Muhammedit (a.s), duke vënë theksin te natyrshmëria e sjelljes së muslimanit me një jomusliman, ku shembujt ishin të shumtë dhe të goditur, në funksion të përgjigjes.
 
Njëkohësisht, iu përgjigj edhe pyetjes mbi etiketimet e muslimanëve si terroristë e të ngjashme, ku nuk la pa përmendur faktin se gabimet dhe keqinterpretimet njerëzore të fesë, nuk duhen konsideruar si pjesë integrale e vetë fesë dhe se secili mban përgjegjësi për gabimin e tij, ndërsa feja, qëndron e pastër me udhëzimet dhe dritën e saj.
 
Në fund të bashkëbisedimit, Imam Muhamed Sytari iu përgjigj edhe pyetjes mbi vizitën e Papës në Tiranë, ku theksoi se kjo vizitë është një gëzim i natyrshëm për besimtarët katolikë, që mezi presin këtë vizitë të shtrenjtë për ta.

 

---