Myftinia Shkodër

Ditën e xhuma, më 22 gusht 2014, me rastin e inaugurimit të xhamisë së re në fshatin Barbullush, Myftiu i Shkodrës, Imam Muhamed Sytari, mbajti hytben e rastit. Në fjalën e tij të përjavshme, Myftiu u ndal te rëndësia që ka për muslimanin, garimi në jetë për të bërë mirë, në rrugën e përkushtimit ndaj Zotit.
 
Myftiu kërkoi nga besimtarët që ta falënderojnë All-llahun e Madhëruar për këtë dhuratë të madhe që u bëri, ndërtimin e kësaj xhamie të re, që do të jetë një vatër për edukimin dhe udhëzimin e rinisë dhe popullatës muslimane të zonës.
 
Në hytben e tij të kësaj xhumaje të parë në këtë xhami të re, Imam Muhamed Sytari, tërhoqi vëmendjen e besimtarëve të pranishëm se në kohëra jo shumë të largëta, shqiptarët u distancuan nga besimi dhe feja, në gabimin më fatal të historisë së tyre kombëtare, duke u dëshmuar si vendi i vetëm ateist në botë.
 
Prandaj, vijoi Myftiu: “Është e domosdoshme të pendohemi dhe të kërkojmë falje për një kohë të shkuar, larg Zotit dhe udhëzimit të tij. Duhet t’ia hapim derën e zemrës Zotit dhe mësimeve të Tij, të kthehemi nga drita e besimit dhe të rrugëtojmë pa frikë drejt udhëzimit dhe pëlqimit të Tij. Dëshmojeni kudo se jeni muslimanë, pa frikë e pa ndrojtje! Mos u tundoni nga islamofobia dhe nga misionarët e së keqes në shoqërinë tonë, që nuk po lënë asnjë rast pa sharë e pa ofenduar Islamin dhe muslimanët, me një mllef dhe urrejtje ekstreme!
 
Por, ky realitet, vetëm se na bën të jemi më të vetëdijshëm për t’u thelluar në besimin dhe fenë tonë dhe për të kontribuar për të mirën e këtij vend dhe kësaj toke, me besim, dije, urtësi dhe vlera islame, me të cilat janë karakterizuar të parët tanë, prej të cilëve e kemi trashëgim këtë besim dhe këtë udhëzim islam!”
 
Në fund të kësaj hytbeje, Myftiu nuk ka lënë pa falënderuar të gjithë kontribuuesit dhe të angazhuarit për përfundimin me sukses të misionit fisnik për ngritjen e kësaj xhamie të re në fshatin Barbullush.

 

---