Myftinia Shkodër

Ditën e xhuma, më 15 gusht 2014, Myftiu i Shkodrës, Imam Muhamed Sytari, priti në një takim të përzemërt e vëllazëror, Hfz. Mehas Alija, imam i Bashkësisë Islame “El-Hidaje”, në St. Gallen të Zvicrës, në shoqëri të zotërinjve të nderuar, Elez Ismaili dhe Hamdi Iljazi, intelektualë të shquar nga Tetova.

Në krye të herës, Myftiu shprehu kënaqësinë e tij për këtë vizitë të shtrenjtë të imamit të nderuar shqiptar në Zvicër dhe miqve të tij, njëkohësisht miq të Myftinisë Shkodër.

Myftiu theksoi se këto vizita e rrisin ndjenjën e përgjegjësisë drejt përmirësimit të bashkëpunimit dhe ruajtjes së lidhjeve në mesin e institucioneve islame dhe intelektualëve të tyre, në trojet shqiptare dhe diasporë. Njëkohësisht u fol për shtimin dhe rritjen e cilësisë së botimeve islame në gjuhën shqipe, përmirësimin e cilësisë së prezantimit të mësimeve të fesë islame në gjuhën shqipe etj.

Nga ana e tij, Hfz. Mehas Alija, pasi e falënderoi Myftiun për pritjen e ngrohtë dhe vëllazërore, i përcolli atij selamet dhe përshëndetjet e besimtarëve dhe kryesisë së B.I. “El-Hidaje”, në St. Gallen.

Me këtë rast, ai bëri edhe një prezantim të shkurtër të aktivitetit të kësaj bashkësie islame, që ditë pas dite është e angazhuar për ta prezantuar sa më mirë mesazhin islam dhe traditat e bukura shqiptare, që burojnë nga shpirti i Thirrjes Islame.

Ai foli edhe për bashkëpunimin e B.I. “El-Hidaje” me institucionet shtetërore dhe kishat e ndryshme në Zvicër, në kuadër të respektit dhe harmonisë së ndërsjelltë.

Me rastin e kësaj vizite, Myftiu e ftoi imamin e nderuar, hfz. Mehas Alija, për të mbajtur hytben e xhumasë së sotme në xhaminë e Parrucës.