Myftinia Shkodër

Ditën e xhuma, më 8 gusht 2014, Myftiu i Shkodrës, Imam Muhamed Sytari, priti në një takim të përzemërt e vëllazëror studiuesin e mirënjohur islam, Mr. Muhidin Ahmeti, imam i Qendrës Kulturore Shqiptare "Mesxhid El-Resul", në Wels të Austrisë.
 
Myftiu ka shprehur kënaqësinë e tij për vizitën në Shkodër të z. Muhidin Ahmeti, një ndër thirrësit islam të afirmuar në Shkodër, sidomos në vitet e para të ripërtëritjes së fesë, pas rënies së komunizmit. Në ato vite të vështira për Myftininë Shkodër, zotëria i tij, së bashku me një grup hoxhallarësh të nderuar nga trevat shqiptare të Kosovës dhe Maqedonisë, ishin të parët që dhanë kontribute të dobishme në edukimin e masave islame dhe gjallërimin e xhamive dhe medresesë me mësimet dhe kontributin e tyre intelektual.
 
Myftiu e ka vënë në dijeni z. Ahmeti për aktivitetin aktual të Myftinisë Shkodër, ku nuk ka lënë pa përmendur mirënjohjen e tij për kontributet që vëllezërit nga trevat shqiptare, jashtë Shqipërisë, dhanë për këtë qytet dhe ripërtëritjen e vlerave dhe traditave islame në të.
 
Nga ana e tij, Mr. Muhidin Ahmeti e ka informuar Myftiun e Shkodrës për aktivitetin e Qendrës Kulturore Shqiptare që ai drejton, në Wels të Austrisë, duke theksuar se vlerat e Thirrjes Islame po përhapen ditë pas dite në perëndim, në përputhje të plotë me vlerat e qytetërimit perëndimor.
 
Pjesë e bisedës së përzemërt ishin edhe botimet e ndryshme të Myftinisë Shkodër, për të cilat z. Muhidin Ahmeti ka shprehur vlerësimin e tij dhe ka nxitur vijimin e botimeve dhe shtimin e aktivitetit fetar e intelektual, në drejtim të forcimit të mëtejshëm të traditave dhe vlerave islame në Shkodër.
 
Me rastin e kësaj vizite, Myftiu i dhuroi z. Muhidin Ahmeti disa nga botimet e Myftinisë Shkodër në vitet e fundit.