Myftinia Shkodër

Ditën e parë të Fitër Bajramit, më 28 korrik 2014, pas kryerjes së ceremonive të Fitër Bajramit, Myftinia Shkodër ka organizuar pritjen tradicionale të miqve dhe vizitorëve, me rastin e kësaj dite të shënuar në kalendarin e festave islame.
 
Myftiu dhe imamët e pranishëm, në ambientin e përgatitur enkas për vizitorët, në xhaminë e Parrucës, kanë pritur me përzemërsi vizitorët e ndryshëm, duke nisur nga drejtuesit më të lartë të institucioneve fetare të Shkodrës, drejtuesit e institucioneve vendore e lokale, deputetët, drejtuesit e shoqatave, intelektualët e besimtarët e shumtë.
 
Gjatë kësaj pritje, ra edhe një herë në sy, respektimi i festave fetare në Shkodër, si një gjurmë e traditës së respektimit të fesë dhe besimtarëve, sidomos në këto ditë, kur mbarë bota përkujton mirësitë e Fitër Bajramit.
 
Edhe në dersin e mbajtur me rastin e Fitrit, por edhe në pritjen e vizitorëve, Myftiu i Shkodrës ka theksuar se ky Fitër Bajram vjen më i gjakosur se kurrë, si pasojë e bombardimeve vrastare dhe krimeve ndaj njerëzimit, me të cilat izraelitët po sulmojnë e vrasin pa mëshirë, njerëz të pafajshëm, një popull heroik e qëndrestar si palestinezët, të cilëve pasi u kanë grabitur tokën, po u shkatërrojnë edhe pasuritë, pronat dhe mbi të gjitha po u marrin jetën!
 
Me rastin e kësaj dite, Myftinia Shkodër lutet që paqja dhe mëshira e Zotit të zbresë mbi Gaza, Siri, Irak, Egjipt, Burma, lokalitetet muslimane të Kinës, vendet islame të Afrikës dhe mbarë botën, ku muslimanët po persekutohen si asnjëherë tjetër në historinë e njerëzimit!