Myftinia Shkodër

Myftiu mbajti hytben e fundit të Imam Muhamed Sytari, mbajti sot në xhaminë e Parrucës, hytben e fundit të Ramazanit të sivjetshëm.
 
Fillimisht, Myftiu foli për mësimet e mëdha, me të cilat Zoti i gjithësisë i tregoi njerëzisë, në këtë muaj, se besimtarët me bindje dhe përkushtim në besimin e tyre, sado të pakët në numër e sado të braktisur nga bota që të jenë, do të kenë përherë mbarësinë dhe mbështetjen hyjnore.
 
Këtë, tha Myftiu, e pamë më së miri me vëllezërit tanë në GAZA, të cilët po bombardohen e po vriten në mënyrën më barbare nga ushtria izraelite, pa asnjë të drejtë!
 
Myftiu foli edhe për domosdoshmërinë e kthimit të muslimanëve nga Fjala e All-lahut, Kur'ani, si udhërrëfyesi dhe dritësuesi më i përsosur i jetës së njeriut. Myftiu pyeti: "Ku është sot Zeburi, Teurati, Inxhili? Ku janë origjinalët e tyre? Nuk janë më! Me këtë nuk dua të prek besimin as bindjen e të tjerëve, jo aspak, por dua të them se muslimanët, kudo që të jenë, duhet të ndjehen krenarë që Zoti e ka vulosur Kur'anin me vulën e paprekshmërisë! Kur'ani që lexojmë sot, është i njëjti, që ka lexuar edhe Resulull-llahu (a.s), pa asnjë presje më pak! Prandaj, mos ta braktisim Kur'anin e mos të na shkojë jeta në injorancë, pa e shfletuar një herë Librin e All-llahut, për ta mësuar, për ta lexuar, e mbi të gjitha, për ta vënë në jetë!"
 
Myftiu falënderoi krejt imamët e Shkodrës, xhematet, shoqatat bamirëse, biznesmenët e kontribuuesit, ata që shtruan iftare vëllazërore, ata që dhanë zekatin dhe sadeka të ndryshme, mediat lokale për pasqyrimin serioz të aktiviteteve të këtij Ramazan, pjesëmarrësit në Hatmen e Kur'anit dhe krejt ata të rinj e të reja, që këtë muaj e dëshmuan veten e tyre si muslimanë të lidhur pas fesë së tyre, pa ndrojtje e paragjykim.
 
Myftiu përsëriti se shuma e sadekatul-fitrit për këtë vit është 300 lekë të reja për person, sikurse bëri të ditur se namazi i Fitër Bajramit do të falet në sheshin bri xhamisë “Ebu Bekër”, ditën e hënë, më 28 korrik 2014, duke nisur nga ora: 05.00, kur do të falet edhe namazi i sabahut me xhemat.
 
Hytben e plotë, mund ta ndiqni sot, në ora: 19.00, në Tv1 Channel.