Myftinia Shkodër

Paraditën e së hënës, më 14 korrik 2014, Myftiu i Shkodrës, Imam Muhamed Sytari, i shoqëruar edhe nga bashkëpunëtorë të tij, bëri një vizitë në kalanë e Drishtit, ku u takua me banorët e pakët që jetojnë aty, në kuadër të vizitave të Muajit Ramazan.
 
Myftiu dëgjoi nga banorët e kësaj lagjeje për kushtet e mjerimit, në të cilin ata jetojnë, pa ndihmë e pa përkrahje ekonomike, vetëm me një asistencë minimale prej 2.000 (dy mijë) lekësh të reja në muaj.
 
Banorët iu ankuan Myftiut edhe për kushtet e vështira, në të cilat fëmijët e tyre detyrohen të përballen me to, për të ndjekur arsimin, poshtë në fshatin Drisht.
 
Me rastin e Muajit të Begatë të Ramazanit, për 12 familjet muslimane, banuese në kala të Drishtit, u shpërnda "Shporta ushqimore e Ramazanit", si një mbështetje nga Myftinia Shkodër për këta banorë në kushte të vështira jetese.
 
Me këtë rast, Myftiu premtoi se Myftinia Shkodër do ta ndjekë më me prioritet situatën e këtyre familjeve dhe do të përpiqet maksimalisht të jetë pranë tyre, jo vetëm me rastin e festave dhe ditëve të shënuara fetare.
 
Me këtë rast, Myftiu vizitoi edhe xhaminë, thuajse të rrënuar të lagjes, ku shprehu hidhërimin e tij për veprimin amatoresk dhe tendencioz të ndërtuesve dhe projektuesve të Shtëpisë Muze, që qëndron mbi xhaminë dhe që ka marrë edhe nga vakëfi i saj, duke mos vënë asnjë dorë në restaurimin e kësaj xhamie të vjetër e të lashtë.
 
Myftiu theksoi, se nëse ky godinë do të kishte qenë një objekt kulti jomusliman, drejtuesit dhe qeveritarët e kohës do të vraponin ta rikonstruktonin, pa më të voglin dyshim!
 
Myftiu u angazhua se me mbarësinë e Zotit, shumë shpejt, do të nisë rikonstruksioni i xhamisë, ndërtimi i minares së shkatërruar, rrethimi i vakëfit dhe rikëndimi i ezanit, në këtë zonë 100% muslimane.