Myftinia Shkodër

Myftiu i Shkodrës, Imam Muhamed Sytari, mbajti sot, më 11 korrik 2014, hytben e xhumasë në xhaminë e lagjes Tophanë. Në hytben e tij, Myftiu vuri theksin te nevoja e kuptimit drejtë të agjërimit, si një adhurim që e kryejmë me vullnet dhe pëlqim maksimal, në rrugën e afrimit dhe përmirësimit të lidhjes me Krijuesin e gjithësisë.
 
Në fillim të hytbes, Myftiu përmendi se para disa ditësh, një joagjërues e kishte pyetur: “A po mundeni me qëndru?”. Ai theksoi se kjo është pyetja më qesharake, që mund të dëgjosh, sepse muslimanët nuk agjërojnë nga halli, por me vullnet të lirë dhe me dëshirën më të madhe. Madje, - vijoi Myftiu,- ne e presim me përmallim afrimin e Ramazanit, sepse e dimë fare mirë se është një mundësi më shumë që na jepet në jetë, për të përmirësuar cilësinë e dëshmimit tonë si muslimanë dhe si adhurues, që nuk tundohen nga sprovat e kohës, për të dëshmuar fenë dhe thirrjen e tyre shpirtërore!
 
Myftiu theksoi se sprovat, me të cilat përballet bashkësia e muslimanëve shqiptarë, janë të veshura me heshtje. Ai theksoi se muslimanët shqiptarë, më shumë se kurrë sot duhet të kuptojnë se nuk kanë të ardhme pa Islamin dhe se kjo fé u ka ruajtur emrin, nderin, kombin, gjuhën dhe të sotmen.
 
Në hytben e kësaj xhumaje u bënë lutje edhe për vëllezërit tanë në Gaza, Palestinë, Siri, Irak etj., ku u theksua se sprovat e fundit, po shërbejnë për të zgjuar muslimanët dhe për të vënë në lëvizje forcën e unitetit të tyre.
 
Pas namazit të xhumasë, Myftiu drejtoi namazin e xhenazen në mosprezencë, për shehidët e katër ditëve të fundit në Gaza, si pasojë e agresionit dhe krimeve të luftës që po ushtrohen mbi këtë popull të lirë.