Myftinia Shkodër

Ditën e enjte, më 3 korrik 2014, në xhaminë e Parrucës, Myftinia Shkodër ka organizuar në një rreth të ngushtë me imamë, teologë, pedagogë, intelektualë e të rinj muslimanë, promovimin e librit më të ri nga thirrësi islam Lavdrim Hamja, të titulluar: “Lexoj dhe mësoj Kur’an”.
 
Në fjalën e tij hapëse, teologu Ervil Kuçi ka vënë theksin te rëndësia që ka angazhimi i thirrësve islamë shqiptarë, në pasurimin e jetës fetare dhe bibliotekës islame, sidomos me botime të dobishme, që ofrojnë njohuri dhe dije të reja, të domosdoshme për jetën fetare.
 
Ndërsa teologu Arben Halluni, në fjalën e tij, ka përshëndetur librin e ri të teologut Lavdrim Hamja, si një libër që përkon edhe me Muajin e Begatë të Ramazanit, në të cilin nisi zbritja e Kur’anit Famëlartë. Ai theksoi se ky libër do të shërbejë më së miri edhe për xhamitë dhe kurset fetare, që Myftinia Shkodër organizon në to, për mësimin e alfabetit të Kur’anit dhe leximin e rrjedhshëm të tij.
 
Me shumë vëmendje, të pranishmit kanë ndjekur edhe fjalën e autorit, në të cilën ka treguar shkaqet që e kanë nxitur në përpilimin e këtij libër, në të cilin ka material të bollshëm për mësimin e gjuhës së Kur’anit, rregullat e texhvidit dhe një ndihmë për të gjithë ata që kanë nevojë për një mbështetje në leximin e sureve kryesore dhe xhyzit “Amme”, pjesët e të cilit janë sjellë edhe me shkronjat e alfabetit tonë, krahas origjinalit.
 
Aktiviteti u përshëndet edhe nga Myftiu i Zonës Shkodër, Imam Muhamed Sytari, i cili pasi falënderoi autorin e librit për këtë vepër të dobishme, solli në vëmendje të pjesëmarrësve kujtime nga koha e studimeve dhe personazhet e librit të ri, sidomos dijetarin e texhvidit, Shejkh Ramadan Dib.
 
Myftiu u lut për mbarësinë e teologëve dhe thirrësve, që kanë nisur të angazhohen me penën dhe letrën, në dobi të komunitetit besimtar.
 
Për të pranishmit u shpërnda libri “Lexoj dhe mësoj Kur’an”, si dhe numri i ri i gazetës “Udha Islame”, kushtuar Muajit Ramazan. Ndërkohë, pas faljes së namazit të akshamit me xhemat, të pranishmit kanë marrë pjesë në iftarin e shtruar nga Myftinia Shkodër.