Myftinia Shkodër

Pasditën e së mërkurës, më 25 qershor 2014, Myftinia Shkodër ka organizuar për të katërtin vit radhazi, aktivitetin fetar, në prag të Muajit të Begatë të Ramazanit: “Sofra e Kur’anit”.
 
Këtë vit, për herë të parë, ky aktivitet u zhvillua në teatrin “Migjeni”, ku të pranishëm për të kënduar pjesë të ndryshme nga Kur’ani, Libri i fundit hyjnor, i zbritur në Muajin Ramazan, ishin, hafizët e nderuar: Abdullah Shaqiri (Maqedoni), Idriz Osmani (Maqedoni), Ali Pollat (Gjermani), Ibrahim Akbullut (Gjermani) dhe Ahmed Hillmaz (Danimarkë).
 
Aktiviteti u përshëndet nga Myftiu i Shkodrës, Imam Muhamed Sytari, që falënderoi të pranishmit për pjesëmarrjen në këtë mbrëmje të mbushur me emocionet dhe përshpirtësinë e prag-Ramazanit.
 
Myftiu theksoi se Kur’ani është garancia më e mirë për jetën e njerëzimit, për t’u kthyer nga besimi dhe vërtetësitë e tij shekullore absolute, të përmbledhura në Kur’anin Famëlartë, të vetmin Libër hyjnor të padevijuar nga dora e njeriut.
 
Myftiu i Malësisë së Madhe, H. Edmir Smajlaj, në fjalën e tij përshëndetëse, uroi të gjithë besimtarët me rastin e Muajit Ramazan, duke falënderuar këtë organizim, në të cilin mbushen zemrat me Fjalën e Zotit dhe lartësohet Emri i Tij.
 
I ftuar special i kësaj mbrëmje të begatë besimi në Shkodër, ishte edhe drejtori i Thirrjes Islame në Komunitetin Mysliman të Shqipërisë, teologu Elvis Naçi.
 
Në ligjëratën e mbajtur prej tij, u spikat ftesa për t’u kthyer nga Kur’ani, si Libri në të cilin, secili njeri mundet të gjejë rrugët e suksesit dhe mbarësisë në jetë. Nëpërmjet shembujve realë nga jeta e përditshme dhe tregimet e të parëve, teologu Elvis Naçi bëri thirrje që besimtarët të jenë të kujdesshëm në respektimin e porosive kur’anore dhe urdhëresave hyjnore, që e edukojnë njeriun të jetë shembull udhëzimi në jetën e tij.
 
Të pranishmit ndoqën me shumë kënaqësi edhe këndimet e pjesëve të ndryshme kur’anore dhe ilahitë e bukura në gjuhën shqipe, që mbushën sallën me emocionet e besimit dhe ato të Muajit Ramazan.
 
Për të pranishmit, Myftinia Shkodër ka shpërndarë edhe broshurën: “Njinimi i Muajit Ramazan”, nga Hoxha i nderuar, H. Vehbi S. Gavoçi, si dhe kalendarin e këtij muaji të begatë.