Myftinia Shkodër

Ditën e mërkurë, më 18 qershor 2014, Myftiu i Shkodrës, Imam Muhamed Sytari, priti në një takim të përzemërt, Ambasadorin e OSBE, z. Florian Raunig dhe Ambasadoren e Francës, znj. Christine Moro, në një bashkëbisedim mbi fenomenin e gjakmarrjes dhe dëmet e tij në shoqërinë shqiptare.
 
Pasi u ka uruar mirëseardhjen në Shkodër, ambasadorëve me stafet e tyre, Myftiu ka theksuar se në fjalët e urta arabe, thuhet se: “Kush nuk e vlerëson lirinë e tij, nuk do të arrijë asnjëherë ta mbrojë lirinë!”. Nga këtu, Myftiu ka vënë në pah faktin se fenomeni i gjakmarrjes dhe ngujimi i familjeve në hasmëri, e ka burimin te kushtet tranzicionale, nëpër të cilat kalon vendi ynë.
 
Më pas, ka folur edhe për rolin e Myftinisë Shkodër në shërimin dhe trajtimin e këtij fenomeni, nëpërmjet predikimeve të ndryshme, shkrimeve, mesazheve dhe ndërhyrjes në terren për të paqtuar familje në hasmëri, ndonëse ky fenomen nuk ka ndonjë përhapje të madhe në zonat muslimane të Shkodrës.
 
Gjatë këtij takimi, Myftiu theksoi se përfshirja e lëndës së edukimit fetar në kurrikulat e arsimit shqiptar, si një model i suksesshëm edhe në shumë vende të Europës, do të kishte ndikimin e tij pozitiv edhe në eliminimin e këtij fenomeni. “Një fëmijë që edukohet që në bankat e shkollës me ekzistencën e Një Zoti, që është Mëshirues, mësimet e të Cilit janë burim i të mirës, harmonisë, paqes dhe solidarizimit të njeriut me vëllanë e tij njeri; është më i gatshëm që nesër të jetë një individ më i pjekur dhe më largpamës në ndërtimin e marrëdhënieve në mesin e njerëzve. Edukata fetare që mësohet në shkollat tuaja, duhet të rikthehet edhe në shkollat tona, ndonëse politikat e deritanishme të vendit tonë, kanë ngelur peng i mentalitetit komunist dhe afetar, që i mbylli këto shkolla, duke pasur për tendencë vrasjen e besimit!” – ka thënë Myftiu.
 
Në kontekstet e idesë së vetëgjyqësisë, si shkak i mungesës së shtetit, Myftiu ka theksuar se fenomeni i vetëgjyqësisë, shpeshherë po kthehet në alternativë për t’u studiuar, sidomos në realitetet e korrupsionit dhe mungesës së vullnetit për t’i dhënë të drejtën legjitime dhe të munguar Myftinisë Shkodër, sidomos në çështjen e pronave dhe zaptimit ilegjitim të tyre.
 
Myftiu ka theksuar se rropatja e pafund, mbi 24 vjeçare, me të cilën ne si komunitet po përballemi në fenomenin e moskthimit të pronave tona dhe zaptimit të tyre ditën për diell dhe me ndihmën e influencave politike, po kthehet në një lojë nervash, ku me siguri Myftinia Shkodër do të dijë si ta fitojë, duke mos e mbajtur kokën e ulur përpara askujt!
 
Në fund të takimit, Myftiu ka shprehur gatishmërinë e Myftinisë Shkodër për të vazhduar në rrugën e dhënies së kontributit të saj në drejtim të paqtimit të njerëzve, duke bashkëpunuar me të gjithë institucionet a faktorët seriozë, të interesuar për shërimin e këtij fenomeni.