Myftinia Shkodër

Paraditën e së shtunës, më 14 qershor 2014, Myftiu i Shkodrës, Imam Muhamed Sytari, priti në një takim të përzemërt Kryetarin e Bashkisë së Uskudarit, në Stamboll, z. Hilmi Türkmen, me delegacionin shoqërues.
 
Fillimisht, Myftiu i ka uruar mirëseardhjen në Shkodër miqve nga Turqia. “Është kënaqësi e dyfishtë për mua dhe Myftininë Shkodër vizita e juaj në qytetin tonë. Fillimisht, për faktin se ne gëzohemi pa masë, kur vendin tonë e vizitojnë vëllezër të mirë e të sinqertë, të cilët i duan të mirën vendit tonë, si rasti i Turqisë. Së dyti, se Uskudari është Shkodra e Stambollit!” – ka thënë Myftiu.
 
Më pas, bisedat janë përqendruar tek informacionet mbi aktivitetin e Myftinisë Shkodër, sidomos në prag të Muajit të Begatë të Ramazanit dhe përgatitjet për pritjen sa më mirë të mirësive të tij.
 
Myftiu i ka prezantuar vizitorët edhe me një historik të shkurtër të persekutimit komunist ndaj Islamit dhe muslimanëve në Shqipëri. “Akoma sot, fëmijëve tanë u mësohet se osmanët ishin pushtues dhe ata që na ndërruan fenë me dhunë. Akoma sot, politikat islamofobike punojnë pa ndërprerje kundër vlerave dhe traditave tona kombëtare islame”- ka theksuar Myftiu.
 
Me rastin e kësaj vizite, Myftiu ka theksuar se ka ardhur koha që në Shkodër të ketë një konsullatë turke, që do ta plotësonte më së miri mozaikun e shteteve mike, që kanë konsullata në Shkodër.
 
Nga ana e tij, Kryetari i Bashkisë së Uskudarit, z. Hilmi Türkmen, ka shprehur vlerësimet e tij për këtë vizitë në Shkodër, duke shprehur njëkohësisht edhe kënaqësinë e tij të përjetuar në qytetin tonë, gjatë dy ditëve të qëndrimit të tij në të.
 
Me rastin e kësaj vizite, janë këmbyer edhe dhuratat përkatëse, ndërkohë z. Türkmen e ka ftuar Myftiun e Shkodrës për një vizitë në Uskudar të Stambollit, në muajin Ramazan.