Myftinia Shkodër

Të xhumanë, më 13 qershor 2014, Myftiu i Shkodrës, Imam Muhamed Sytari, ka mbajtur hytben e xhumasë në xhaminë e Medresesë. Në qendër të hytbes së kësaj jave, ka qenë realiteti i përditshëm i shoqërisë shqiptare, i mbushur me varfëri materiale dhe intelektuale, tendenca afetare, përpjekje të studiuara dhe politika të djallëzuara, për ta zhveshur shqiptarin nga besimi dhe Islami në mënyrë të specifikuar.
 
Gjatë hytbes së tij, Myftiu ka përmendur se Zoti na thërret që të kthehemi nga rrugët e besimit në Një Zot dhe në dërgesat profetike, që e plotësuan vullnetin e Zotit për njeriun dhe mbarëvajtjen e jetës së tij në tokë.
 
“Asnjë rrugë tjetër përtej asaj të besimit, nuk i ka sjellë qëndrueshmëri në sukses, jetës së njeriut. Prandaj, sot është momenti që të kthehemi nga Zoti dhe të heqim dorë nga thirrjet shterpë të atyre që mundohen me të gjitha pushtetet e kësaj bote, për ta zhveshur individin dhe shoqërinë nga thirrja dhe ftesa e besimit” – ka thënë Myftiu.
 
Gjatë kësaj hytbeje, Myftiu i është referuar hadithit kudsi, ku ndër të tjera thuhet: “O i biri i Ademit, mos u frikëso nga asnjë pushtet, sado që ekziston pushteti Im dhe, dije se pushteti Im nuk shuhet asnjëherë! O i biri i Ademit, mos u frikëso nga ngushtimi i rizkut, sado që magazinat e mirësive të Mia janë të mbushura dhe, dije se magazinat e mirësive të Mia nuk boshatisen asnjëherë!... O i bir i Ademit, Unë të dua ty, prandaj, pash hakun Tim, më duaj edhe ti Mua!”.
 
Në hytben e dytë, Myftiu ka bërë thirrje që të shfrytëzohen ditët e mbetura para Muajit Ramazan, si një mundësi për t’u bërë gati në mënyrën më të mirë, për ta pritur këtë muaj të madhërishëm.
 
“Ta shtojmë dhikrin, faljen e pesë kohëve të namazit me rregull, salavatet dhe namazet nafile, në prag të ardhjes së Ramazanit, si mënyra më e mirë për pritjen e tij”- ka përfunduar Myftiu.