Myftinia Shkodër

Paraditën e së hënës, më 2 qershor 2014, Myftiu i Shkodrës, Imam Muhamed Sytari priti në një bashkëbisedim sqarues një përfaqësi të tregtarëve të Zdrales, mbi gjendjen e krijuar, nga momenti që Bashkia Shkodër nuk i ka dhënë zgjidhje situatës së krijuar pas marrjes nga Myftinia Shkodër të çertifikatës legjitime të vakëfit të saj, pas sekuestrimit, në vitin 1967.
 
Gjatë bashkëbisedimit me përfaqësuesit e tregtarëve, Myftiu ka sqaruar se Myftinia Shkodër dhe Komuniteti Mysliman i Shqipërisë, janë të interesuar për ta zhvilluar vakëfin e Zdrales, me ndërtimin e një Qendre Tregtare bashkëkohore, ç’ka do të thotë, prishjen e tregut aktual të ngritur nga Bashkia në pronën vakëf.
 
Myftiu ka sqaruar se e gjithë ecuria e veprimeve të Myftinisë Shkodër është krejtësisht e ligjshme dhe në përputhje me ligjet në fuqi të vendit.
 
Njëkohësisht Myftiu ka theksuar se që nga data 7 tetor 2013, kur edhe është marrë çertifikata e kësaj prone, Myftinia ka lajmëruar me shkresë zyrtare Bashkinë, që të mos rinovojë kontratat vjetore me tregtarët e Zdrales. Njëkohësisht ka kërkuar nga Bashkia, që tregtarëve në fjalë, t’u gjendet një treg alternativ, si përgjegjësi e Bashkisë Shkodër.
 
Gjatë këtij bashkëbisedimi, Myftiu u komunikoi tregtarëve vendimin e marrë nga drejtuesit e Komunitetit Mysliman të Shqipërisë, Myftinisë Shkodër dhe partnerëve të interesuar për këtë bashkëpunim të dobishëm në favor të zhvillimit të vakëfit, për lejimin e tregtarëve aktualë për zhvillim të aktivitetit të tyre tregtar, deri më 15 janar 2015, në pronën e çertifikuar Myftinisë Shkodër.
 
Myftiu ka informuar përfaqësinë e tregtarëve se për këtë periudhë mbi një vjeçare, Myftinia Shkodër ka vendosur të mos marrë asnjë qera nga tregtarët e këtij tregu provizor të ngritur kohë më parë nga Bashkia Shkodër, në shenjë solidarizimi me ta.
 
Myftiu ka theksuar sërish se problemi i tregtarëve në fjalë është përgjegjësi e Bashkisë Shkodër dhe se Myftinia Shkodër ka kërkuar nga Kryetari i Bashkisë që të gjejë një vend alternativ për tregtarët në fjalë.