Myftinia Shkodër

Ditën e xhuma, më 16 maj 2014, është zhvilluar ceremonia për inaugurimin e përfundimit të punimeve për rehabilitimin e “Shtëpisë së Fëmijës”, Shkodër, si pjesë e një projekti të mbështetur nga Ambasada e Kuvajtit në Tiranë.
 
I pranishëm në këtë ceremoni festive, ishte vetë Ambasadori i Shtetit të Kuvajtit në vendin tonë, z. Najeeb Al-Bader, shoqëruar edhe nga Ambasadori i Libisë, z. Isam Ferexh Ibn Xhelil dhe Myftiu i Zonës Shkodër, Imam Muhamed Sytari.
 
Në emër të institucionit të “Shtëpisë së Fëmijës”, Shkodër, ka përshëndetur drejtori, z. Arjan Dushaj, i cili ka falënderuar përzemërsisht mbështetjen e Ambasadës së Shtetit Kuvajtit për ndryshimin e pamjes së objektit, ku banojnë 44 fëmijë jetimë të moshave nga 6-20 vjeç. Në fjalën e tij, z. Dushaj ka falënderuar edhe Myftininë Shkodër për interesimin e vazhdueshëm dhe koordinimin për zbatimin me sukses të këtij projekti me vlera. Ai ka theksuar se përveç ndërhyrjes në krejt objekt, është bërë edhe zëvendësimi i krejt orendive dhe mobilierisë së brendshme, orendive të kuzhinës, veshmbathjes së fëmijës etj.
 
Nga ana e tij, Ambasadori i Kuvajtit, z. Najeeb Al-Bader, ka shprehur kënaqësinë e tij për pjesëmarrjen në këtë ceremoni domethënëse, duke theksuar se kjo ndihmë e dhënë nga Shteti i Kuvajtit, është një shprehje e miqësisë dhe vëllazërisë në mesin e dy popujve tanë. Ai ka konfirmuar se me mbarësinë e Zotit, Ambasada e Kuvajtit do të vazhdojë të jetë e pranishme në Shkodër , nëpërmjet projekteve të dobishme në të mirë të komunitetit dhe njerëzve në nevojë.
 
Fëmijët, të gëzuar nga dhurata e Ambasadës së Shtetit të Kuvajtit, i kanë dhuruar z. Al-Bader, lutjet dhe mesazhet e tyre të përzemërta, në një vazo të zbukuruar nga duart e tyre.