Myftinia Shkodër

Ditën e xhuma, më 16 maj 2014, Myftiu i Shkodrës, Imam Muhamed Sytari, ka mbajtur hytben e tij të xhumasë në xhaminë e Koplikut, në Malësi të Madhe.
 
Në trajtesën e tij të kësaj jave, Imam Muhamed Sytari, ka folur mbi rëndësinë që ka harmonizimi i veprimeve dhe kontributeve në mesin e muslimanëve shqiptarë, duke iu referuar 24 viteve të fundit, ku, siç ka thënë Myftiu: “Të shumta janë kontributet e dhëna nga donatorë të ndryshëm nga mbarë bota islame, në shërbim të rimëkëmbjes së trashëgimisë islame në vendin tonë gjatë kësaj periudhe, por, është koha që muslimanët shqiptarë të rikthehen tek traditat e baballarëve të tyre, të cilët janë dëshmuar përherë si bamirës! Vakëfet e shumta, për të cilat përpiqemi kaq shumë, për t’i rikthyer në identitet, janë dëshmia më e mirë e sinqeritetit të tyre; nuk i shoi dot komunizmi, s’e bën dot as postkomunizmi! Sepse ajo që është dhënë me sinqeritet, do të mbrohet, qoftë edhe pas 100 vitesh! Prandaj, unë ju ftoj sot që të zgjohemi e të mos shohim interesat e ngushta të shoqatave e fondacioneve, por të bashkëpunojmë për të mirën e komunitetit tonë! Askush, nuk mund të bartë i vetëm barrën e kësaj Thirrje të shenjtë Islame, së bashku mund të bëjmë atë që pritet të bëjmë, e që akoma s’e kemi bërë si duhet, në hak të fesë dhe kohës sonë!”
 
Në hytben e tij, Myftiu i Shkodrës ka bërë lutje që All-llahu t’i japë udhëzimin e duhur Komunitetit Mysliman të Shqipërisë, Myftinive, imamëve, hatibëve dhe krejt faktorëve që shërbejnë sot në të mirë të Thirrjes Islame, për të mirën e kësaj feje të pastër islame.
 
Më herët, Myftiu i Zonës Shkodër, mori pjesë edhe në inaugurimin e Qendrës së re Islame të Koplikut, mbështetur nga Fondacioni “Mirësia”, me donacione bamirëse nga Kuvajti.