Myftinia Shkodër

Pasditën e së enjtes, më 8 maj 2014, Myftinia Shkodër organizoi një aktivitet shkencor, në përkujtim të dijetarit të shquar islam shkodran, Hafiz Halid Bushati (? – 1916).
 
Aktiviteti, që u zhvillua në ambientet e bibliotekës së qytetit, nisi me referatin e teologut Naim Drijaj, që bëri një përshkrim të momenteve më të spikatura nga jeta e këtij dijetari të shquar. Në jetëshkrimin e prezantuar para të pranishëmve, u theksua lidhja e këtij dijetari me xhaminë, fetvanë dhe bibliotekën, si pjesë e pandarë e aktivitetit të tij të spikatur.
 
“Urtësia, maturia, autoriteti, kompetenca e drejtësia e tij, të bazuara në mësimet islame, u jepnin rrugë nevojave e halleve të njerëzve, bënin jehonë, rritnin figurën e tij fetare, qytetare e njerëzore.” – tha referuesi.
 
Një analizë të gjerë të dorëshkrimeve dhe gjurmëve shkencore të trashëguara nga H. Halid Bushati, e ka zhvilluar në referatin e tij, Myftiu i Shkodrës, Imam Muhamed Sytari.
 
“Në hulumtimet e mia rreth personalitetit dhe gjurmëve diturore të dijetarit Hafiz Halid Bushati, më tërhoqi vëmendjen një shënim anësor me shkrim dore, në brendësinë e një libri të vjetër në gjuhën arabe, në të cilin dëshmohet se: “Besimtari arrin në gradën e miqësisë me All-llahun me një nga këto tri rrugë: duke lexuar në librat e të parëve, ose të dojë për hir të All-llahut, ose të ketë një prijës murshid”.
 
Të trija këto tri stacione drejt lartësimit në marrëdhënie me Zotin, që reflektojnë në jetën e përditshme të besimtarit, në shoqëri, i kam gjetur dhe evidentuar në ato pak gjurmë cilësore, që koha i ka ruajtur në botën e sekreteve të saj të çmuara, për llogari të dijetarit H. Halid Bushati.” – ka thënë Myftiu.
 
Aktiviteti ka vijuar me një vështrim kushtuar Hoxhës H. Halid Bushati, nga H. Fejzi zaganjori, që ka përshëndetur këtë iniciativë të Myftinisë Shkodër për vazhduar me aktivitetin e saj në nderim të dijetarëve dhe hoxhallarëve të shquar të Shkodrës.
 
Me shumë emocion, në emër të familjes Bushati, ka përshëndetur nipi i H. Halid Bushatit, shkrimtari Xhahid Bushati, që përveç falënderimeve për organizatorin, ka shpalosur edhe disa kujtime dhe emocione që lidhen me emrin dhe kujtimin e dijetarit H. Halid Bushati.
 
Me rastin e këtij aktiviteti, Myftiu i Shkodrës i ka dhuruar z. Xhahid Bushati dhe bibliotekës së Shkodrës, nga një foto të vulës dhe kaligrafisë arabe të këtij dijetari të nderuar islam shkodran.