Myftinia Shkodër

Vonesat dhe mos realizimi i ndërhyrjes së lajmëruar zyrtarisht nga INUV-Bashkia Shkodër për ndërhyrjen e shembjes së një objekti pa leje në pronën e Myftinisë Shkodër në Zdralej, ditën e martë, më 29 prill 2014, është e dështimi i radhës i INUV në raport me detyrimin që ka ndaj Myftinisë Shkodër.
 
Ndonëse ishim lajmëruar me shkresë zyrtare nga INUV- Bashkia Shkodër, për ndërhyrjen që do të bëhej sot për prishjen e këtij objekti të paligjshëm në tokën tonë vakëf, në Zdralej, ndërhyrja nuk u bë. Përfaqësuesit e Bashkisë, thonë se nuk i ka mbërritur lajmërimi personit uzurpues, që prej vitesh mban peng truallin e Myftinisë Shkodër, duke shkaktuar dëme ekonomike për mosmundësimin e shfrytëzimit tonë të vakëfit të shenjtë.
 
Mirëpo, prej informacioneve të sakta që kemi, personi në fjalë, gjatë kësaj jave është ankuar edhe në Komunitetin Mysliman të Shqipërisë, por edhe në vetë zyrat e Bashkisë Shkodër!?
 
Pyetja që shtrojmë është: Kur konsiderohet i lajmëruar ky person, që na ka mbajtur peng vakëfin e shenjtë, edhe me ndihmën e disa deputetëve dhe ndërhyrjeve politike, të njëjtat që na kanë mbajtur peng edhe vakëfin në Zogaj?
 
Për informacionin e të interesuarve, kjo godinë duhej të ishte prishur që në vitin 2005, por për ndërhyrjet e ulëta të politikës në Shkodër, vakëfi ynë u mbajt peng për 9 vite!
 
All-llahut i ankohemi për vakëfin tonë, Atij i ankohemi për të gjithë ata që u bënë shkak që zaptimi i vakëfit të vazhdonte deri në këtë kohë!