Myftinia Shkodër

Ditën e hënë, më 28 prill 2014, Myftiu i Shkodrës, Imam Muhamed Sytari, priti në një takim prezantimi, Drejtorin e ri të Qendrës Kulturore Turke “Yunus Emre”, në Shkodër, z. Ömer Osman Demirbaș.
 
Bashkëbisedimi i ngrohtë në mes Myftiut dhe z. Demirbaș, u përqendrua te gjurmët e hoxhallarëve të shkuar të Shkodrës dhe trashëgimia e tyre e madhe, që i ka dhënë Shkodrës një krenari legjitime, atë të Islamit të pastër, të bazuar në edukatën shpirtërore, thellimin në dije, respektin ndaj librit, bibliotekave dhe nxitjes së dashurisë dhe harmonisë për çdo krijesë.
 
Gjatë takimit, Myftiu e ka njohur mikun e tij me disa nga personalitetet e shquara të dijes islame në Shkodër gjatë shekujve, si: H. Muhamed Bekteshi, H. Ymer Bakalli, H. Halid Bushati, H. Vehbi Gavoçi, Salih ef. Myftija, H. Sheuqet Boriçi, Sheh Qazim Hoxha etj, dhe ka konfirmuar edhe një herë lidhjen e madhe që hoxhallarët kanë pasur me qendrat islame të kohës, prej të cilave janë furnizuar me literaturë dhe burime të tjera, në shërbim të Thirrjes Islame dhe mësimeve të saj.
 
Nga ana e tij, Drejtori i Q. K. “Yunus Emre”, në Shkodër, ka konfirmuar dëshirën e madhe për t’u informuar në vazhdimësi mbi trashëgiminë e dijetarëve të Shkodrës, që në vetvete, është trashëgimi shpirtërore e Shkodrës.
 
Dy bashkëbiseduesit kanë këmbyer edhe dhuratat simbolike në fund të këtij takimi të ngrohtë, në shoqërinë e kujtimit të mirë të hoxhallarëve dhe bibliotekave të tyre.