Myftinia Shkodër

Ditën e dielë, më 27 prill 2014, Myftinia Shkodër në bashkëpunim me Zyrën e Këshilltarit për Çështjet Fetare në Ambasadën e Republikës së Turqisë, kanë organizuar një aktivitet fetar me temë: "Profeti Muhammed (a.s) dhe sinqeriteti në Islam", ku ka ligjëruar Myftiu i Ankarasë, prof. dr. Mefail Hizli.
 
Aktiviteti nisi me këndimin e disa pjesëve kur’anore, nga hafizi i mirënjohur turk, H. Ahmed Karali, imam i xhamisë “Haxhi Bajram Veli”, në Ankara.
 
Më pas, teologu Arben Halluni, pasi ka uruar mirëseardhjen e miqve dhe të ftuarve, ka theksuar se ky aktivitet është pjesë e një cikli ligjëratash, që organizohen në vazhdën e bashkëpunimit që Zyra e Këshilltarit për Çështjet Fetare në Ambasadën e Republikës së Turqisë, ka me Komunitetin Mysliman të Shqipërisë dhe në rastin e sotëm me Myftininë Shkodër.
 
Në fjalën e tij të përshëndetjes, Myftiu i Shkodrës, Imam Muhamed Sytari, ka përshëndetur prezencën në Shkodër të Myftiut të Ankarasë, prof. dr. Mefail Hizli, duke vlerësuar se organizime të tilla, kanë vlera dhe dobi për besimtarët dhe bashkësinë e muslimanëve në Shkodër dhe përtej saj.
 
Në fjalën e tij, Myftiu u ndal te një mesazh i rëndësishëm në jetën dhe shembullin e Hz. Muhammedit (a.s); sinqeriteti dhe vendosmëria në shërbim të Thirrjes Islame. Në këtë kontekst, Myftiu rrëfeu ngjarjen e Taifit, ku edhe pas refuzimit dhe dëbimit që iu bë të dërguarit të All-llahut, ai, në qetësi, iu drejtua Zotit, duke i dëshmuar bindjen dhe vendosmërinë e tij, nëpërmjet një lutje të rrethuar nga sinqeriteti dhe emocionet.
 
Myftiu ka ripërsëritur se sfidat e përditshme, me të cilat përballen muslimanët në Shkodër dhe në Shqipëri, kërkojnë më shumë se asnjëherë tjetër, ndjekjen e shembullit të Hz. Muhammedit dhe veshjen me sinqeritet e vendosmëri.
 
Më pas, aktiviteti ka vijuar me përshëndetjen në emër të Kryetarit të Komunitetit Mysliman të Shqipërisë, që është bërë nga nën/kryetari, z. Gazmend Aga.
 
Në fjalën e tij, ai ka folur mbi altruizmin, duke theksuar se prej sinqeritetit është që njeriu të vendosë vëllanë para vetes dhe interesin e gjerë mbi atë të ngushtë, në jetë.
 
Atasheu turk, z. Shaban Ishlek, në përshëndetjen e tij, ka vënë theksin te rëndësia që kanë aktivitetet që bashkojnë njerëzit në tryezat e besimit dhe forcojnë vëllazërinë islame, nëpërmjet këtyre vizitave të shtrenjta dhe aktiviteteve me dobi.
 
Me shumë kënaqësi, të pranishmit kanë ndjekur ligjëratën e mbajtur nga Myftiu i Ankarasë, prof. dr. Mefail Hizli. Në qendër të saj, Myftiu ka shpjeguar hadithin profetik: “Feja është këshillë” me pesë degëzimet e saj, si në fjalën e Profetit (a.s).
 
Myftiu ka shprehur kënaqësinë e tij që gjendet sot në Shkodër, duke e vlerësuar këtë udhëtim si pjesë të shprehjes së dashurisë dhe vëllazërisë që muslimanët kanë më njëri-tjetrin. Për këtë, ai ka nxitur shtimin e harmonisë dhe vëllazërisë në mesin e muslimanëve, në shembullin e Hz. Muhammedit (a.s) dhe sahabëve të tij.