Myftiu i Ankarasë, për vizitë në Shkodër

Paraditën e së dielës, më 27 prill 2014, Myftiu i Shkodrës, Imam Muhamed Sytari, priti në një takim vëllazëror, Myftiun e Ankarasë, nga Republika e Turqisë, prof. dr. Mefail Hizli, që shoqërohej edhe nga Këshilltari për Çështjet Fetare në Ambasadën e Turqisë, z. Shaban Ishlek.
 
Fillimisht, Myftiu i Shkodrës, ka shprehur kënaqësinë e tij për vizitën e Myftiut të kryeqytetit të Turqisë, në Shkodër, duke e konsideruar si vlerësim për Myftininë e Shkodrës. Myftiu ka kujtuar edhe vizitën e paharruar në Shkodër, të Kryetarit të Dijanetit të Turqisë, prof. dr. Mehmet Gormez, vitin që kaloi.
 
Edhe Myftiu i Ankarasë, ka vlerësuar se Shkodra është një ndër qytetet më tërheqëse, që ka vizituar në udhëtimet e tij të shumta, duke nisur nga pozitiviteti që reflektojnë banorët e saj e deri te historia dhe kultura e pasur. Prof. Hizli, ka përmendur se kjo është vizita e tij e katërt në Shqipëri, e para si Myfti i Ankarasë, në kuadër të aktiviteteve të përbashkëta fetare në mes të dy vendeve.
 
Gjatë takimit është folur edhe për mundësitë e shumta që janë lehtësuar sot, për ta shtuar bashkëpunimin në fusha të ndryshme, në mes të dy komuniteteve islame të vendeve tona.
 
Me rastin e kësaj vizite, Myftiu i Ankarasë, do të jetë ligjërues në simpoziumin me temë: "Profeti Muhammed (a.s) dhe sinqeriteti në Islam", që zhvillohet si pjesë e bashkëpunimit të Zyrës së Këshilltarit për Çështje Fetare në Ambasadën e Turqisë, me Komunitetin Mysliman të Shqipërisë dhe Myftinitë e ndryshme të saj.
 
Me rastin e kësaj vizite, janë këmbyer edhe dhuratat e rastit. Ndërkohë, për nder të mikut të tij, Myftiut të Ankarasë, Imam Muhamed Sytari, ka shtruar një drekë vëllazërore.

 

 

Myftiu i Ankarasë, për vizitë në Shkodër
Myftiu i Ankarasë, për vizitë në Shkodër
Myftiu i Ankarasë, për vizitë në Shkodër
Myftiu i Ankarasë, për vizitë në Shkodër
Myftiu i Ankarasë, për vizitë në Shkodër