Myftinia Shkodër

Paraditën e së hënës, më 14 prill 2014, Myftiu i Shkodrës, Imam Muhamed Sytari, ka zhvilluar një vizitë në shtëpinë e z. Idriz Keqi, kujdestar dhe muezin i vjetër i xhamisë së fshatit Luarëz, komuna Velipojë.
 
Gjatë kësaj vizite, Myftiu është interesuar për shëndetin e burrit të urtë e të përkushtuar, 80 vjeçarit, që ishte ndër nismëtarët e parë për dhurimin e tokës, ndërtimin e xhamisë dhe mirëmbajtjen e saj, në fshatin Luarëz, në vitin 1998.
 
Myftiu ka shprehur vlerësimin e tij për shembullin e burrave të përkushtuar, që janë mbi të gjitha shembuj pozitiv për brezat, duke dëshmuar besimin dhe vullnetin e trashëgimisë së dritës së besimit dhe të fesë, pa u frikësuar nga pengesat dhe vështirësitë e jetës.
 
Me këtë rast, Myftiu i ka dorëzuar muezinit të moshuar një “Mirënjohje dhe Falënderim”, në emër të institucionit të Myftinisë Shkodër, duke shprehur kënaqësinë dhe mirënjohjen ndaj përkushtimit të z. Idriz Keqi, gjatë viteve të vështira të rimëkëmbjes së xhamisë dhe misionit të saj në fshatin Luarëz.
 
Nga ana e tij, z. Idriz Keqi, ka shprehur vlerësimet e tij dhe të familjes për këtë vizitë të Myftiut dhe stafit të tij, duke përforcuar se kontributet e dhëna, kanë qenë dhe janë një shërbim i sinqertë për hatër të All-llahut, në shërbim të fesë së Tij.
 
Në këtë vizitë, Myftiu shoqërohej nga imami i xhamisë Luarëz, z. Hajrullah Jakupi, teologu Arben Halluni dhe teologu Ervil Kuçi.