Myftinia Shkodër

Pasditën e së xhumasë, më 11 prill 2014, në një atmosferë të këndshme besimi dhe vëllazërie islame, është promovuar përkthimi në shqip i librit të dijetarit Shejkh Muhammed El-Gazali, “E vërteta e hidhur”, realizuar nga thirrësi islam, Lavdrim Hamja.
 
Në krye të herës, teologu Ervil Kuçi, ka bërë një prezantim të shpejtë të librit, duke vënë theksin te rëndësia e promovimit të botimeve të reja islame në gjuhën shqipe. Gjatë fjalës së tij, ai ka spikatur një pjesë nga libri, rreth “sëmundjeve të zemrës”.
 
Një recensë të librit e ka bërë teologu Arben Halluni, gjatë fjalës së të cilit, është prezantuar thelbi i këtij libri, që është konsideruar si recetë për shumë nga problematikat me të cilat përballet ymeti islam, individi dhe shoqëria.
 
Me shumë vëmendje është ndjekur fjala e përkthyesit, z. Lavdrim Hamja. Në fjalën e tij, teologu Hamja ka vlerësuar mendimin dhe shpirtin me të cilin Shejkh Muhammed El- Gazali ka shkruar veprat e tij, të cilat janë përhapur në botën islame, duke u vlerësuar maksimalisht nga lexuesit e ndryshëm të tyre.
 
Gjatë fjalës së tij, është ndalur tek përkufizimi që i bën autori demokracisë dhe si trajtohen muslimanët në raport me demokracinë në botë.
 
Aktivitetin e ka përshëndetur edhe Myftiu i Shkodrës, Imam Muhamed Sytari, që pasi ka falënderuar përkthyesin Lavdrim Hamja për kontributin e tij në shqipërimin e veprave të ndryshme të Shejkh Gazaliut, është ndalur në leximin e pjesës me titull: “Njerëz pa dinjitet”, në të cilën, autori përkufizon njerëzit me pushtet që shesin dinjitetin e tyre duke sulmuar Islamin, ndërkohë, jashtë vendeve të tyre, i binden verbërisht rregullave dhe besimeve të tjetrit.
 
Me këtë rast, Myftiu i ka dhuruar përkthyesit Lavdrim Hamja, një kujtim nga shënimet vetanake të hoxhallarëve të nderuar shkodranë, H. Jusuf Këlmendi (1876-1943), H. Ali Kraja (1900-1973) dhe H. Esat Myftija (1911-1975), të mbledhura në një faqe libri të vjetër në arabisht.
 
Aktivitetin e ka përshëndetur edhe Myftiu i Malësisë së Madhe, H. Edmir Smajlaj dhe imami i xhamisë së Rusit, H. Fejzi Zaganjori, që kanë falënderuar përkthyesin për këtë kontribut, si dhe Myftininë Shkodër për mbështetjen e botimit.