Myftinia Shkodër

Të mërkurën, më 9 prill 2014, pas namazit të akshamit, në xhaminë Fatih të Durrësit, u organizua një tjetër mbrëmje fetare, pjesë e ciklit: “Frytet e besimit”, që organizon Komuniteti Mysliman i Shqipërisë në xhami të ndryshme, në mbarë vendin.
 
Në këtë mbrëmje, që i ishte përkushtuar dashurisë për All-llahun dhe për të dërguarin e Tij, ligjëroi nënkryetari i KMSh, z. Klodi Shehu, si dhe Myftiu i Zonës Shkodër, Imam Muhamed Sytari.
 
Në ligjëratën e tij, “Rreth dashurisë për të Dërguarin (a.s)…”, Myftiu i Shkodrës tërhoqi vëmendjen e të pranishëmve drejt ëmbëlsisë që mbush qënien e besimtarit, teksa përpiqet të ndjek gjurmët e dashnisë së Hz. Muhammedit (a.s), si shtysë për të rregulluar jetën.
 
Përtej argumenteve të ndryshme dhe ndodhive konkrete, Myftiu shtroi edhe disa pyetje, si: “Sa të aftë jemi për të fituar kohën e shtrenjtë në rrugën e përmirësimit të cilësisë së jetës sonë, ne vetvete dhe në rrethe të afërta? Sa sukses kemi në frenimin e zemërimit, kur shpesh irritohemi nga ngjarje të çuditshme dhe fenomene paradoksale, që prekin fenë tonë, dinjitetin tonë njerëzor, formimin tonë qytetar e kombëtar!? Pra, sa të aftë jemi ne si muslimanë, sot, për t’u dëshmuar thirrës islamë nëpërmjet veprave dhe sjelljes, pa pasur nevojë për përdorimin e gjuhës?”.
 
Nëpërmjet këtyre pyetjeve, ligjëruesi ka kërkuar nga të pranishmit, që koncepti i dashurisë për të dërguarin (a.s), të shërbejë si mënyrë përmirësimi i cilësisë së jetës së muslimanëve, në rrugën e udhëzimit pas traditave profetike dhe personalitetit të Hz. Muhammedit (a.s).
 
Aktiviteti ka vijuar me këndimin e ilahive dhe salavateve me xhemat, si dhe faljen e namazit të jacisë, në një atmosferë të këndshme besimi dhe vëllazërie islame.