Myftinia Shkodër

Ditën e mërkurë, më 2 prill 2014, Myftinia Shkodër ka ftuar besimtarët të marrin pjesë në aktivitetin fetar me temë: “Vlera të vëllazërisë islame”, në kuadër të nismës së Komunitetit Mysliman të Shqipërisë: “Frytet e besimit”.
 
Aktiviteti ka nisur me këndimin e ezanit të akshamit nga teologu Bilal Teqja, i cili ka drejtuar edhe namazin e akshamit, duke mbushur zemrat e besimtarëve me leximin e bukur të Kur’anit.
 
Më pas, Myftiu i Shkodrës, Imam Muhamed Sytari, ka vlerësuar se këto mbrëmje fetare janë një mundësi më shumë për t’u afruar me dashninë e All-llahut, në rrugën e dëshmimit si besimtarë të përkushtuar që e duan dhe e mbrojnë njëri-tjetrin.
 
Myftiu ka uruar mirëseardhjen në Shkodër të dy nënkryetarëve të KMSh, z. Gazmend Aga dhe z. Klodi Shehu, të kancelarit të KMSh, z. Ali Zaimi, drejtorit të Thirrjes Islame në KMSh, z. Elvis Naçi, Myftiut të Malësisë së Madhe, H. Edmir Smajlaj etj.
 
Në ligjëratat e mbajtura para të pranishëmve, z. Ali Zaimi dhe teologu Elvis Naçi, kanë hedhur dritë mbi vlerat e vëllazërisë islame dhe domosdoshmërinë e angazhimit të secilit për të dëshmuar sa më mirë këto vlera islame. Është vënë theksi te ajetet kur’anore dhe hadithet e ndryshme, që nxisin muslimanët për të lënë mënjanë veset dhe ndikuesit që e dobësojnë vëllazërinë islame, si dhe të punojnë me përkushtim në rrugën e forcimit të saj në shoqëri.
 
Me shumë emocion janë përcjellur edhe ilahitë e bukura, me tekste të vjetra shqipe, të kënduara me shumë mjeshtri nga H. Sami Muçej, 83 vjeçari që vazhdon të shërbejë me shumë përkushtim në gjallërimin e xhamive me këndimet e bukura të pjesëve të “Mevludit” dhe ilahive të larmishme.
 
Pas faljes së namazit të jacisë me xhemat, për të pranishmit është shpërndarë edhe ujë Zemzemi.