Myftinia Shkodër

Ditën e xhuma, më 28 mars 2014, është zhvilluar Konferenca e tretë vjetore e imamëve të Myftinisë Shkodër.
 
Në qendër të fjalës së Myftiut, Imam Muhamed Sytari, kanë qenë sfidat me të cilat përballet bashkësia e muslimanëve në Shkodër dhe në Shqipëri, si dhe angazhimi serioz dhe maksimal i secilit në rrugëtimet shërbyese ndaj Fjalës së Zotit dhe mësimeve të Tij.
 
Në fjalën e mbajtur para të pranishëmve, Myftiu i Shkodrës, ka tërhequr vëmendjen e imamëve që të jenë korrektë me detyrën që kanë marrë mbi supe dhe të mos ndikohen nga asnjë tendencë a thirrje shterpë për ta nënçmuar rolin që imami ka në shoqëri.
 
Myftiu ka dënuar thirrjet mesjetare të disa “mjeranëve, që edhe nëpërmjet gazetës “Panorama”, duan të bëhen protagonist, duke derdhur vnerin gjenetik kundër Islamit dhe muslimanëve…” dhe, atë që e ka quajtur: “kryqëzatë të dëshpëruar të disave që duan të na kthejnë në mentalitetet meskine të disa gazetave të këtij shpirti, që dilnin në Shkodrën e dhjetë viteve të fundit, duke mbjellur dasi fetare, urrejtje dhe mllefe mjerane”
 
Gjithashtu, Myftiu ka kërkuar që Islami mos të izolohet vetëm në katër muret e xhamive, por të punohet për përhapjen e tij edhe përtej xhamive. “Në këtë kontekst, kur përmendim shërbimet tona ndaj vlerave kombëtare, duhet të keni parasysh se traditat më të mira shqiptare e kanë origjinën e tyre në Kur’an dhe në traditën e Hz. Muhammedit (a.s)” – ka theksuar në fjalën e tij Imam Muhamed Sytari.
 
Me shumë interes është ndjekur edhe fjala e imamit të xhamisë së Rusit, H. Fejzi Zaganjori, në të cilën është ndalur edhe në një detaj shumë interesant, kur ka theksuar: “Historinë le t’ia lëmë historianëve, por kur vjen fjala për Islamin dhe dëgjojmë se ai ishte prurje e pushtuesit, atëherë edhe katolicizmin e sollën pushtuesit romakë, ortodoksinë pushtues sllavë!? Por, ky mentalitet, nuk ka lidhje me shpirtin me të cilin duhet të ecë përpara kombi shqiptar dhe komunitetet fetare në të!”.
 
Gjatë kësaj konference, janë dhënë udhëzime të shumta në drejtim të përmirësimit dhe rritjes së cilësisë së prezantimit të vlerave islame, si dhe është kërkuar nga imamët që të jenë në krye të detyrës, duke u bërë mësues të urtë, jo nxënës të mendimeve dhe ideve që futen në trupin e bashkësisë tonë për ta shkatërruar e për ta prishur harmoninë në mesin e muslimanëve.