Myftinia Shkodër

Mbrëmjen e së hënës, më 24 mars 2014, H. Fejzi Zaganjori, imam i xhamisë Rus, ka marrë pjesë në një bashkëbisedim të organizuar në emisionin “Shqip”, të gazetares Rudina Xhunga, në Tv Top Channel, në lidhje me fenomenin e gjakmarrjes.
 
Gjatë këtij bashkëbisedimi, përfaqësuesi i Myftinisë Shkodër, H. Fejzi Zaganjori, ka hedhur dritë mbi rëndësinë që ka në Islam, mbrojtja dhe respektimi i jetës së njeriut dhe mbjellja e frymës së harmonisë dhe bashkëjetesës në mesin e individëve të shoqërisë. Në këtë drejtim, ai i është referuar ajeteve të ndryshme kur’anore dhe haditheve profetike, që na thërrasin përherë e më shumë drejt këtyre mësimeve të shenjta.
 
Imami i nderuar, ka theksuar se Myftinia Shkodër, nëpërmjet aktivitetit të saj dhe thirrjeve të herëpashershme, ka dhënë kontributin e saj në rrugën e parandalimit të këtij fenomeni vrastar. Në këtë drejtim, - ka theksuar H. Fejzi Zaganjori, - Myftinia Shkodër ka zhvilluar tryeza dhe takime për të analizuar shkaqet dhe pasojat e fenomenit të gjakmarrjes, në rrugën e angazhimit për të zgjidhur këtë ngërç shoqëror.
 
H. Fejzi Zaganjori, ka vlerësuar njëkohësisht edhe bashkëpunimin e komuniteteve fetare në kuadër të dhënies së një kontributi maksimal për pajtimin e njerëzve, afrimin e familjeve në hasmëri dhe eliminimin maksimal të fenomeneve që marrin jetë njerëzish.
 
H. Fejzi Zaganjori është një aktivist i hershëm i Myftinisë Shkodër në fushën e pajtimit të gjaqeve dhe kontributet e tij në këtë drejtim janë të shumta dhe të suksesshme.