Myftinia Shkodër

Ditën e hënë, më 3 mars 2014, Myftinia Shkodër ka organizuar një koktjel, me rastin e vlerësimit me “Mirënjohje” të punës dhe kontributit mbi 20 vjeçar në shërbim të KMSh dhe Myftinisë Shkodër, të imamit të nderuar, z. Fadil Elez Kraja, në atmosferën e 80 vjetorit të tij.
 
Me këtë rast, Myftiu i Shkodrës, Imam Muhamed Sytari, ka vlerësuar kontributin dhe shërbimet e shumta të z. Fadil E. Kraja, në mbi 20 vite, në të cilat ka shërbyer në shumë detyra dhe vende, si: Myfti i Lezhës, imam në disa zona të Shkodrës dhe mësues i mësim-besimit, ku përherë është interesuar të kryejë me përkushtim detyrën e ngarkuar.
 
Myftiu ka theksuar se është obligim të shprehim falënderimet dhe mirënjohjen tonë ndaj atyre që na mësojnë fenë, që kontribuojnë për të dhe kthehen në shembuj udhëzimi dhe orientimi për më të rinjtë.
 
Më pas, Myftiu i ka akorduar z. Fadil E. Kraja, “Mirënjohje”, nëpërmjet së cilës, Myftinia Shkodër: “shpreh vlerësimin dhe mirënjohjen e saj për punën e palodhshme, angazhimin korrekt dhe vullnetin e lartë të dëshmuar në periudhën 1991 – 2014 në shërbim të Myftinisë Shkodër, si imam, vaiz, mësues mësim-besimi…”.
 
Me shumë emocion, z. Fadil E. Kraja, ka falënderuar Myftininë Shkodër për këtë vlerësim, si dhe ka ndarë emocione dhe kujtime me të ftuarit, duke theksuar se shërbimet e deritanishme kanë qenë shprehje e gatishmërisë së tij për të shërbyer në dobi të mësimeve dhe mesazheve islame kudo, ku komuniteti ka patur nevojë. Njëkohësisht, nuk i ka fshehur emocionet e tij, i rrethuar në mesin e shokëve të hershëm dhe miqve të mirë.
 
Vlerësime dhe kujtime të bukura, plot emocione, nga shërbimet dhe miqësia me z. Fadil E. Kraja, si imam e mësues, kanë dhënë edhe H. Fejzi Zaganjori, z. Kujtim Dervishi, z. Arben Halluni, H. Bashkim Bajraktari, teologu Lavdrim Hamja, z. Bujar Ballaj, z. Hajrullah Jakupi, H, Kujtim Cufaj, teologu Naim Drijaj, z. Ferit Hafizi, z. Ismet Alushi dhe teologu Ervil Kuçi.
 
Kjo ceremoni vëllazërore është mbyllur me një lutje të përbashkët.