Myftinia Shkodër

Mbrëmjen e së martës, më 25 shkurt 2014, Myftiu i Shkodrës, Imam Muhamed Sytari ka marrë pjesë në pritjen, që Ambasada e Kuvajtit në Tiranë ka organizuar me rastin e ditës së Pavarësisë.
 
Me këtë rast, Myftiu ka uruar Ambasadorin e Kuvajtit, z. Najeeb Al-Bader, me rastin e kësaj dite të shënuar për popullin kuvajtian, duke uruar që ditë plot mirëqenie, besim, siguri e përparim të ketë për Shtetin e Kuvajtit dhe popullin e tij. Me këtë rast, Myftiu e ka falënderuar Ambasadorin Al-Bader për angazhimet e tij në drejtim të forcimit të marrëdhënieve vëllazërore në mesin e dy vendeve dhe kontributin në mbështetje të projekteve të ndryshme, në kuadër të bashkëpunimit me Myftininë Shkodër.
 
Gjatë kësaj mbrëmje festive, Myftiu është takuar edhe me Kryetarin e Bashkësisë Islame të Kosovës, Mr. Naim Tërnava, me të cilin ka këmbyer urimet dhe lutjet më të përzemërta për mbarësi dhe sukses në punën dhe arritjet e ndërsjellta. Njëkohësisht, ka këmbyer edhe urime të sinqerta me ish-Myftiun e Dibrës së Madhe, z. Ruzhdi Lata, sot Kryetar i Komunës Dibër, në Republikën e Maqedonisë.
 
Ambasada e Shtetit të Kuvajtit në Tiranë, është hapur në vitin 2011 dhe nga ajo ditë, Myftinia Shkodër ka krijuar një marrëdhënie të mirë bashkëpunimi për projekte të ndryshme në dobi të komunitetit.