Myftinia Shkodër

Të xhumanë, më 21 shkurt 2014, Myftiu i Shkodrës, Imam Muhamed Sytari, priti në një takim zyrtar, Ambasadorin e Turqisë në Shqipëri, z. Hidayet Bayraktar, që vizitoi për herë të parë Shkodrën, pas akreditimit të tij në Shqipëri, disa muaj më parë.

Gjatë takimit, Myftiu ka vlerësuar historinë e përbashkët të dy popujve, ku ka përmendur se për shekuj të tërë, shqiptarët dhe turqit në Kalifatin Osman, kanë drejtuar botën, duke dhënë shembullin më pozitiv në administrim, dije, culture etj.

Ndërsa ambasadori turk, pasi ka falënderuar Myftiun për mikpritjen, ka vlerësuar se në Shqipëri, ai ndjehet si në shtëpinë e tij, për shkak të emëruesve të përbashkët që kanë dy vendet, si në kulturë, tradita, besim etj.

I shoqëruar edhe nga koordinatori i TIKA-s për Shqipërinë, prof. dr. Birol Çetin, ambasadori turk ka dhënë sihariqin e shumëpritur për angazhimin e TIKA-s për mbështetjen e projektit për rehabilitimin e Xhamisë së Plumbit dhe zonës përreth vakëfit të saj.

Gjatë këtij takimi, Myftiu i ka dhuruar ambasadorit turk një portret të komandantit Hasan Riza Pasha, duke vlerësuar se ai ishte dhe mbeti komandanti dhe mbrojtësi i Shkodrës nga pushtimi malazez, në vitin 1913.

Më pas, bisedat kanë vazhduar rreth bashkëpunimit të Myftinisë Shkodër me TIKA-n, në lidhje me projekte të ndryshme që ka Myftinia Shkodër në rrugëtimet e saj.