Këshilli i Myftinisë Shkodër,
vizitë pune në Bashkësinë Islame Ulqin

Paraditën e së shtunës, më 8 shkurt 2014, Këshilli i Myftinisë Shkodër ka organizuar një vizitë pune në Bashkësinë Islame të Ulqinit, në Mal të Zi.
 
Në mikpritje të delegacionit nga Shkodra, Kryeimami (Myftiu) i Ulqinit, Mr. Ali Bardhi, pasi i ka uruar mirëseardhjen në Ulqin vëllezërve nga Shkodra, ka vënë theksin te domosdoshmëria e takimeve të tilla, që forcojnë edhe më shumë urat e bashkëpunimit dhe vëllazërisë islame në mesin e drejtuesve fetarë dhe besimtarëve muslimanë të zonave përkatëse. Ai ka theksuar se tashmë ka ardhur koha që në vazhdën dhe traditën e bashkëpunimeve të dy myftinive, të realizohet marrëveshja e binjakëzimit, që është hedhur edhe më përpara në takimet dypalëshe.
 
Nga ana e tij, Myftiu i Shkodrës, Imam Muhamed Sytari ka vlerësuar mikpritjen dhe ka theksuar se këto takime janë shenja të qarta të vullnetit të mirë për bashkëpunim në mes të dy institucioneve, si dhe një tregues i emëruesve të përbashkët, që na bashkojnë e forcojnë edhe më tepër, duke nisur nga gjuha e bukur shqipe, traditat e vjetra, origjina kombëtare etj, të cilat duhen thelluar mbi bazat e besimit dhe fesë islame.
 
Me rastin e kësaj vizite, janë këmbyer edhe dhuratat simbolike, nëpërmjet të cilave janë këmbyer simbolikat e rëndësishme islame të dy qyteteve; Xhamia e Plumbit dhe ajo e Detarëve.
 
Vizita ka vijuar edhe me faljen e namazit të mesditës në xhaminë e re dhe të bukur të “Detarëve”, ku në shenjë respekti dhe nderimi, Kryeimami i Ulqinit ka ftuar Myftiun e Shkodrës, të drejtojë këtë namaz me xhemat. Ndërkohë, Mr. Ali Bardhi i ka njohur vizitorët me një historik të kësaj xhamie dhe simbolikën e saj në këtë pikë strategjike të qytetit të Ulqinit.
 
Më pas, për nder të Këshillit të Myftinisë Shkodër, u shtrua një drekë e ngrohtë vëllazërore.

 

Këshilli i Myftinisë Shkodër, vizitë pune në B. I. Ulqin 
Këshilli i Myftinisë Shkodër, vizitë pune në B. I. Ulqin 
Këshilli i Myftinisë Shkodër, vizitë pune në B. I. Ulqin 
Këshilli i Myftinisë Shkodër, vizitë pune në B. I. Ulqin 
Këshilli i Myftinisë Shkodër, vizitë pune në B. I. Ulqin