Myftinia Shkodër

Paraditën e së enjtes, më 6 shkurt 2014, Myftiu i Shkodrës, Imam Muhamed Sytari, ka zhvilluar një takim pune në zyrën e Prefektit të Shkodrës, z. Paulin Radovani.
 
Fillimisht, me rastin e kësaj vizite të parë zyrtare, Myftiu e ka uruar Prefektin me rastin e emërimit të tij në këtë post, duke shprehur njëkohësisht vlerësimin e tij për bashkëpunimin e vazhdueshëm të institucionit të Myftinisë Shkodër me atë të Prefektit të Shkodrës, gjatë viteve të shkuara.
 
Nga ana e tij, Prefekti i Shkodrës ka shprehur vlerësimin e tij për rolin elitar që luan Myftinia Shkodër në kultivimin e kulturës së besimit dhe përkushtimit të individit në Shkodër dhe më tej. Ai ka vlerësuar gjithashtu kontributin e Myftinisë Shkodër në prezantimin e saj si një institucion me vlera, në kuadër të gjallërimit të jetës fetare në Shkodër dhe jo vetëm.
 
Në qendër të vëmendjes së këtij takimi ka qenë xhamia e Plumbit dhe nevoja e madhe që ka kjo xhami dhe zona përreth saj për ngritjen e argjinaturave mbrojtëse, sidomos në këtë periudhë të vështirë të vitit, ku reshjet e shiut dhe ujrat e zonës së Qafës, mblidhen në bazenin e xhamisë së Plumbit, duke e rrezikuar përmbytjen e saj dhe njëkohësisht duke penguar hapjen e saj për kryerjen e obligimeve fetare.
 
Është diskutuar edhe për problematikën e pronave në kufijtë e prefekturës, ku Myftiu ka kërkuar mbështetjen e Prefektit Radovani për zgjidhjen e disa prej këtyre çështjeve, që nuk marrin zgjidhje prej dekadash.