Myftinia Shkodër

Pasdrekën e së mërkurës, më 5 shkurt 2014, Myftiu i Shkodrës, Imam Muhamed Sytari ka mbledhur imamët e qytetit, në një takim pune mbi zhvillimet e fundit të tendencave islamofobike në trojet shqiptare, sprovat e shumta me të cilat përballen muslimanët në Shkodër dhe domosdoshmërinë e angazhimit maksimal në shërbim të interesave të Thirrjes Islame.
 
Myftiu nuk ka lënë pa përmendur rastin e dëmtimit të shtatores së murgeshës Gonxhe Bojaxhi në Mitrovicë, që e ka konsideruar si tendencat përçarëse dhe përpjekjet për etiketimin e muslimanëve me diçka që nuk është as në natyrën as në genin e tyre, njëlloj si në rastin e kryqeve të sharruara në zonën e Shkodrës para disa vitesh a edhe vetë shtatoren e vendosur përballë xhamisë “Ebu Bekër”.
 
Ka përmendur “këmbanën” e projektligjit që prek ezanin në Kosovë, si dhe ka porositur që askush nuk ka të drejtë të abuzojë me shenjtërinë e ezanit. Myftiu ka dhënë urdhër të prerë që askush përveç imamit dhe muezinit të xhamisë, nuk ka të drejtë të ndërhyjë në thirrjen e ezanit.
 
Në këtë kontekst, ai ka përmendur rastin e xhamisë “Ebu Bekër”, ku mungesa e disiplinës së stafit të saj, ka krijuar shpeshherë pakënaqësi në mesin e besimtarëve dhe qytetarëve të Shkodrës.
 
Myftiu është ndalur edhe tek disa problematika të tjera, me të cilat ndeshen sot muslimanët dhe besimtarët frekuentues brenda xhamive, ku ka theksuar se nuk do të tolerohet askush që do të dëshirojë të ndryshojë rregullin, traditën dhe disiplinën e xhamive tona.
 
Myftiu ka dëgjuar me vëmendje edhe diskutimet e imamëve, mendimet dhe idetë e tyre dhe është angazhuar se Myftinia Shkodër do të jetë e vëmendshme për të bërë punën e saj, duke respektuar këdo dhe duke mos toleruar asnjë përpjekje që sjell denigrim të muslimanëve, nga kushdo qoftë ajo.