Myftinia Shkodër

Ditën e xhuma, më 31 janar 2014, Myftiu i Shkodrës Imam Muhamed Sytari mbajti hytben e radhës në xhaminë e lagjes Dërgut.
 
Në hytben e kësaj jave, Myftiu foli mbi dashurinë e sahabëve ndaj Pejgamberit (a.s), si një shtysë garante për të jetuar me dinjitet dhe krenari legjitime. Gjatë ligjëratës, doli në pah sakrifica e madhe e sahabëve në rrugën e afrimit me të dërguarin dhe vullneti i tyre i pathyeshëm në drejtim të bindjes ndaj Zotit dhe mësimeve të Tij.
 
Në këtë hytbe, Myftiu dënoi politikën islamofobe në Kosovë dhe Shqipëri, që gjatë këtyre viteve po punon në dëm të interesave kombëtare, sidomos kur fjala është për urrejtjen ndaj Islamit, fesë së pjesës dominante të shqiptarëve në të gjitha trojet e tyre.
 
Myftiu përmendi mllefet e dëshmuara kohët e fundit, si projekt-ligji për ndalimin e ezanit nga 38 parlamentarët e Kosovës, si një lajthitje histerike e pashembullt dhe e patolerueshme.
 
Në hytben e dytë të kësaj xhumaje, Myftiu ka bërë homazh edhe për komandantin Hasan Riza Pasha, Mbrojtësin e Shkodrës, që me 30 janar 1913, u vra pabesisht në Shkodër, pasi udhëhoqi muslimanët e saj në luftën kundra malazezëve, që e kishin rrethuar qytetin.
 
Myftiu ka theksuar se islamofobia e ka kapur për fyti qytetin e Shkodrës, sidomos në 24 vitet e fundit, fakt që vërtetohet po të bëhet një vështrim në politikat e drejtimit të institucioneve kryesore, vendet ku derdhen donacionet për investime, emërtimet e institucioneve të ndryshme, shkollave, rrugëve etj.
 
Ka kërkuar nga të pranishmit që të mos harrohet historia e nderit të këtij qyteti dhe të përmenden me vlerësim hoxhallarët e nderuar dhe shehlerët që drejtuan muslimanët e këtij qyteti, nën udhëheqjen e Komandant Hasan Riza Pashës, në luftën për mbrojtjen e Shkodrës, në ditët e para të pavarësimit të detyruar nga Perandoria më e fuqishme e shekujve të fundit, në momentet e degradimit të saj.