Myftinia Shkodër

Mbrëmjen e së enjtes, më 16 janar 2014, në emisionin “Hapur”, në Tv1 Channel, ka qenë i ftuar Myftiu i Zonës Shkodër, Imam Muhamed Sytari, në një bashkëbisedim mbi jetën dhe misionin e Hz. Muhammedit (a.s).
 
Në përgjigje të pyetjeve të gazetarit Simon Shkreli, Myftiu ka folur fillimisht rreth rëndësisë që ka përkujtimi i lindjes së begatë të Hz. Muhammedit (a.s), si njeriu profet, vula e vëllezërve të tij profetë, të cilët u dërguan ndër shekuj, me qëllim përmirësimin e rrugëtimit të njeriut në këtë jetë, si mëkëmbës i Zotit.
 
Myftiu ka theksuar se me ardhjen e Hz. Muhammedit (a.s), njerëzimi u begatua me shpalljen e fundit dhe mbylljen e dërgesave hyjnore, duke u bërë profeti i parë dhe i vetëm me mision global, jo thjesht për një popull a një fis.
 
Gjatë këtij emisioni është folur edhe mbi rëndësinë që kanë mësimet e Profetit Muhammed (a.s) për njerëzit e kësaj kohe, sidomos pas shfaqjes së degradimit të moralit të besimit, mirëkuptimit dhe respektit të njeriut për vëllanë e tij njeri.
 
Myftiu i është përgjigjur edhe pyetjeve të ndryshme të ardhura në lidhje me temën dhe me përmbajtjen e saj, duke vënë theksin te rëndësia e mirëkuptimit të koncepteve islame dhe largimin nga keqinterpretimet që shkaktojnë devijim dhe sjellje të papranueshme nga vetë feja.
 
Në përfundim të këtij bashkëbisedimi Myftiu ka uruar që njerëzia dhe shqiptarët në mesin e tyre, të kthehen me zemër e pastërti nga besimi, duke vlerësuar Fjalën e Zoti dhe duke jetuar në paqe e mirëkuptim me njëri-tjetrin, pavarësisht diversitetit.