Myftinia Shkodër

Paraditën e së hënës, më 6 janar 2014, Myftiu i Shkodrës Imam Muhamed Sytari ka pritur në zyrën e tij, z. Muhammed Nuredin Gavoçi, djali i madh i dijetarit të shquar islam shkodran, H. Vehbi S. Gavoçi, që u nda nga jeta, më 19 shkurt 2013, në moshën 90 vjeçare, në Emiratet e Bashkuara Arabe.
 
Fillimisht, Myftiu i ka uruar mirëseardhjen në vendlindjen e të parëve të tij, z. M. Nuredin Gavoçi, i cili shkel për herë të parë në Shkodër e Shqipëri.
 
Myftiu ka folur me shumë emocion për marrëdhënien e veçantë, me të cilën Hoxha i nderuar është kujdesur për nxënësit e tij shqiptarë, që përfunduan studimet islame në Damask të Sirisë, duke i bërë shërbimin më të mirë vendlindjes së tij Shkodrës.
 
Njëkohësisht e ka njohur mikun nga Emiratet e Bashkuara Arabe për nderimin dhe vlerësimin që Shkodra dhe muslimanët e saj, i bënë Hoxhës së madh me rastin e ndërrimit jetë. Sikurse e ka njohur atë me titullin “Qytetar Nderi” që Këshilli i Bashkisë Shkodër i akordoi Hoxhës Vehbi S. Gavoçi, më 10 mars 2012.
 
Nga ana e tij, z. Muhammed Nuredin V. Gavoçi, ka shprehur kënaqësinë e tij për këtë vizitë në Shkodër, si dhe mirënjohjen e tij dhe të familjes së tij për vlerësimin e bërë për babain e tij. Ai ka theksuar se Hoxha i nderuar, gjatë gjithë kohës ka punuar për të mirën e fesë islame në vendlindjen e tij dhe në mbarë botën. Njëkohësisht ka konfirmuar se edhe në momentet e fundit të jetës, Hoxha ka lënë amanetet e tij për të mirën e Islamit në Shkodër e Shqipëri.
 
Me rastin e kësaj vizite, z. M. Nuredin V. Gavoçi, i ka dorëzuar Myftiut të Shkodrës një kujtim të veçantë nga orenditë personale të Hoxhës, të përdorura prej tij deri në momentet e fundit të jetës.