Myftinia Shkodër

Imam Muhamed Sytari
Myfti i Zonës Shkodër
 

Po ndiqja një emision special mbi ndodhitë kryesore të vitit 2013 në kanalin televiziv satelitor “Al-Jazeera”. Dy gazetarët, si në një bashkëbisedim, përsërisnin ndodhitë e këtij viti, duke u përqendruar tek “pranvera (e kobshme) arabe” dhe të tjera ndodhi, që të gjithë ne, në një mënyrë a një tjetër, përjetuam së bashku…
 
Për një moment e largova vëmendjen nga emisioni në fjalë dhe sa hap e mbyll sytë, solla në orbitën e kujtesës së afërt ngjarje e ndodhi, të cilat, për mendimin tim, shenjuan rrugëtimin e këtij viti dhe regjistrimin e tij në arkivat e historive të errëta, dekadente e larg rritjes cilësore të sjelljes së racës njerëzore në skenat e jetës.
 
Viti 2013, me gjithë atë që pamë e dëgjuam, u shënua si një ndër vitet më të errëta të historisë së njerëzimit. Njeriu bashkëkohor, me gjithë arritjet në teknologji, shkencë, mjekësi e shumë lëmi të tjera, u dëshmua si model xhungle, pa shpirt, pa mëshirë, pa vlera, plot injorancë e imoralitet!
 
Njeriu i vitit 2013 dështoi në rrugën e vërtetimit se është i denjë të dëshmojë vëllazërinë e shenjtë humane, atë për të cilën Zoti i njeriut, nëpërmjet Librave të Shenjtë, e ka ftuar atë ta dojë e ta respektojë vëllanë e tij human, të dojë për tjetrin atë që do për vete, të mos punojë pas krahëve, të mos vrasë, të mos bëjë tregëti me imoralitetin etj.
 
Me veprën e tij, njeriu bashkëkohor i vitit 2013 vërtetoi dekadencën dhe rrugëtimin në labirinthet e errëta të injorancës dhe fanatizmit ekstremist e vrastar, pa mëshirë e dhembshuri, pa ndjenja njerëzore....
 
Në këtë vit të errët për njerëzimin, vitin 2013, u vranë me mijëra të pafajshëm në mbarë botën, nën sytë dhe vëzhgimet e verbëruara të “botës së qytetëruar”, që si përherë në traditën e saj dinake, u radhit në njërin krah të vrasjes dhe të zjarrit! U bombarduan qytete e fshatra, për faturë të një qytetërimi të dështuar e një sistemi të ri dështak në rrugën e rritjes së cilësisë së jetës mbi Tokë!
 
Mbetën jetimë me mijëra fëmijë të pafajshëm, sidomos në botën islame e atë arabe, në përmbushje të axhendave politike të krimit, vrasjes e shfarosjes së Tjetrit, në një botë pa drejtësi, pa shpirt, pa besim, pa frikë për një ditë llogarie!
 
U dogjën muslimanë të pafajshëm nga duar terroristësh budistë, të mbështetur edhe nga një heshtje totale botërore, për një prej krimeve më makabre të historisë së njerëzimit!
 
U shkatërruan xhamitë dhe u ndalua feja islame me ligj, nga fanatizmi dhe ektremizmi i verbër, në emër të shumicës katolike në Angola... (Vërtetë, botë e tretë, por edhe ky etiketim është stacion prej stacioneve të dekadencës shpirtërore të njeriut bashkëkohor!).
 
Në Shqipëri, shejtani me bijtë e tij besnikë, vazhdon të tallet me muslimanët autoktonë të këtij vendi, duke mbajtur peng ndërtimin e xhamisë katedrale në mes të Tiranës, por jo vetëm, në një kohë kur gojët e palara të shumëkujt, në ditë festash fetare përsërisin pa ia nda se: "modeli shqiptar i harmonisë ndërfetare" ia vlen të prezantohet edhe mëtej në botë...
 
Por, viti diellor 2013 dëshmoi edhe vullnete befasuese kthese, si ai i regjizorit hollandez Arnoud van Dorn, i cili në shkurt të këtij viti u kthye në musliman, pak kohë pasi Geert Wilders, Kryetari i Partisë së Lirisë së ekstremit të Djathtë (pjesë e së cilës ishte edhe van Dorn, regjizor i një filmi të ulët në hak të profetit Muhammed), lëshoi një websit personal të quajtur: “Jo xhamive” në Hollandë… Sepse përherë ka shpresë, sepse kjo gjithësi e ka Një Zot, të Vetëm, të Pashoq!
 
Viti diellor 2013 shkoi... Shkoftë e keqja me të, ndonëse të njëjtat fytyra të modelit 2013, do vazhdojë të dëshmojë kjo botë edhe në këtë 365 ditësh të ri me numrin 2014.., ndonëse e kemi për detyrë të lutemi që kjo botë të pastrohet nga ky model ateist, ekstremist, fanatik dhe i verbër!
 
Cila është zgjidhja e këtij ngërçi, në të cilin ka hyrë njeriu i shekullit të ri, duke u dëshmuar pa shpirt e pa ndjenjë, pa zemër e pa moral? Është e njëjta zgjidhje, si ajo që përherë njeriu e ka pasur në dorë; kthimi nga Zoti, Krijuesi i njeriut, krijuesi i tanësisë. Vetëm Ai nuk na e ka me hile!
 

Shkodër, 31 dhjetor 2013