Ditën e enjte, më 5 dhjetor 2013, nëpërmjet një komunikimi për mediat, Myftiu i Shkodrës Imam Muhamed Sytari ka ripërsëritur kërkesën e tij për kthimin e lëndës së mësim-besimit në shkollat publike të Shqipërisë.
 
Kjo deklaratë ka ardhur një ditë pas vrasjes së dhimbshme në një prej shkollave të Shkozetit, kur një adoleshent vrau me armë zjarri një bashkëmoshatar të tij.
 
Në deklaratën e tij para mediave të pranishme, Myftiu ka theksuar se ka ardhur koha që lënda e mësim-besimit të rikthehet në shkollat e vendit, pasi u hoq në mënyrë arbitrare kohë më parë. “Në këtë mënyrë, do të vërtetohet plotësisht ndarja nga sistemi ateist, që shkatërroi xhamitë dhe objektet e kultit dhe hoqi lëndën e mësim-besimit nga shkollat” – ka vijuar Myftiu.
 
Myftiu ka konfirmuar se lënda e besimit në shkollat e vendit, do të ndikojë në zbutjen e fenomeneve negative dhe do të bëhet shkak në edukimin e fëmijëve me besimin në Zot dhe moralin e fesë.
 
Kërkesa për rikthimin e lëndës së mësim-besimit në shkollat e vendit, është një kërkesë e përsëritur nga Komuniteti Mysliman i Shqipërisë, në takime të ndryshme zyrtare, por edhe deklarata mediatike.
 
Akoma Ministria e Arsimit, nuk ka dhënë asnjë përgjigje për këtë kërkesë, që ndoshta ka ardhur koha të kërkohet në mënyrë më të intensifikuar dhe në një lëvizje kombëtare, për çdo myftini e për çdo qytet, duke sensibilizuar besimtarët drejt kësaj domosdoshmërie, duke iu referuar edhe degradimit të brezit të ri dhe shfaqjes në masë të veprimeve ekstreme dhe imorale.