Pas një pritje të gjatë, muslimanët e fshatit Domën, Komuna Postribë, kanë përjetuar sot, të xhumanë, më 29 nëntor 2013, një ditë të gëzueshme, me rastin e fillimit të punimeve për ndërtimin e xhamisë së re.
 
Ceremonia është zhvilluar në një atmosferë gëzimi, që përzier me ajrin e freskët dhe rrezet e diellit, e bënë këtë të xhuma, një ditë të paharruar për banorët e këtij fshati, thuajse të izoluar në mesin e maleve të zonës.
 
Ceremonia ka nisur me fjalën e hapjes të mbajtur nga teologu Ervil Kuçi, që ka shpjeguar qëllimin e këtij tubimi, lajmin e gëzueshëm për banorët e Domnit, si dhe vlerën dhe rëndësinë që ka xhamia në një komunitet besimtar.
 
Më pas, duke përshëndetur të pranishmit dhe në veçanti Kryetarin e Komunës Postribë, z. Faz Shabaj dhe Drejtorin e Fondacionit “Mirësia”, z. Korab Kaja, Myftiu i Zonës Shkodër Imam Muhamed Sytari, ka shprehur emocionin dhe gëzimin e tij për mbërritjen e kësaj dite të mbarë për fshatin Domën. Myftiu ka vlerësuar se kjo ditë e shumëpritur nga të gjithë, erdhi si një dhuratë hyjnore për krejt muslimanët e Postribës dhe Shkodrës.
 
Në mënyrë simbolike, Myftiu ka vendosur gurin e parë të themelit, me lutjen që kjo xhami e re të përfundojë sa më parë, me cilësinë e pritur dhe të jetë një busull orientimi për të rinjtë dhe banorët e fshatit.
 
Ceremonia është përshëndetur edhe nga Kryetari i Komunës Postribë, z. Faz Shabaj, që ka shprehur vlerësimin e tij për këtë investim që po bëhet në Postribë, duke vlerësuar njëkohësisht ndërtimin e kësaj xhamie të re si një kërkesë të kahershme të besimtarëve të Domnit.
 
Në emër të donatorit, Drejtori i Fondacionit “Mirësia”, z. Korab Kaja ka theksuar se është mirësi e All-llahut, që u mundësua realizimi i këtij bashkëpunimi, në rrugën e ngritjes së xhamisë së re në fshatin Domën. Ai ka falënderuar bashkëpunimin me Myftininë Shkodër, duke vlerësuar njëkohësisht frymën e mirëkuptimit për ringritjen e infrastrukturës shpirtërore në Shkodër e Shqipëri.
 
Me rastin e kësaj ceremonie, Myftiu i Shkodrës i ka dhuruar z. Korab Kaja, “Pasaportën e Resulull-llahut (a.s)”, si shenjë mirënjohje për këtë kontribut dhe bashkëpunim për xhaminë e re të fshatit Domën.
 
Në fund të ceremonisë, imami i xhamisë Domën, z. Smajl Braqi, ka shprehur mirënjohjen e tij për Myftininë Shkodër, Komunën Postribë dhe Fondacionin “Mirësia”, për këtë angazhim të vlerësuar në shërbim të ngritjes së kësaj xhamie të re në Domën.