Paraditën e së enjtes, më 28 nëntor 2013, në të gjitha trojet shqiptare është përkujtuar 101 vjetori i ngritjes së flamurit tonë kombëtar në Vlorë, që shënoi edhe pavarësimin e Shqipërisë dhe nisjen e rrugëtimit të saj si një vend i lirë dhe i pavarur.
 
Edhe në Shkodër, Bashkia e qytetit ka organizuar një ceremoni modeste, në sheshin para godinës së Bashkisë, në kujtim dhe nderim të kësaj date të shënuar kombëtare.
 
Në këtë tubim tashmë tradicional, ka marrë pjesë edhe Myftiu i Shkodrës Imam Muhamed Sytari, i shoqëruar nga imamët H. Fejzi Zaganjori dhe teologu Idmir Plaku.
 
Fillimisht, Myftiu ka uruar Kryetarin e Bashkisë z. Lorenc Luka, Prefektin e Qarkut z. Paulin Radovani, deputetet e ndryshëm, drejtuesit e institucioneve lokale dhe përfaqësuesit e komuniteteve të tjera fetare me rastin e 101 vjetorit të Shqipërisë, si dhe është lutur që Zoti me madhërinë e Tij ta begatojë këtë tokë dhe njerëzit e saj.
 
Pas ceremonisë së këndimit të himnit kombëtar dhe ngritjes së flamurit, Myftiu ka dhënë një intervistë për mediat lokale, ku ka vlerësuar këtë ditë si më të shtrenjtën ditë të shqiptarëve, në të gjitha trojet e tyre dhe në diasporë.
 
Myftiu është lutur për të gjithë ata që kontribuuan për rritjen dhe zhvillimin e Shqipërisë, si dhe ka bërë thirrje që shqiptarët të punojnë përditë e më shumë për të mirën e vendit dhe kombit.